Tender tez ótse, tirlik te tez bitedi

«Jyl bastaldy degenshe tender «jyry» bastalady» deseıshi» degen eken bireý... Sol aıtpaqshy, keshe ǵana ótken jyldy qorytyndylap, qol jetkizgen jetistigimizdi alaqaılap aıtyp júrgende tender degen «tentektiń» jyl saıynǵy hıkaıasy bastalyp ta ketipti. Memlekettik satyp alý isin qansha meńgerdik desek te jyl saıyn ár nárse sebep bolyp, keı kezderi qańtarda qolǵa alynǵan konkýrstardyń qyrkúıekke deıin sozylyp, adamdy salpyldatyp qoıatyny bar. – Sodan bolar «tender tez ótse, tirlik te tez bitedi. Memlekettik satyp alý isi ýaqtyly ári ádiletti ótse, qurylys ta óz merziminde ári sapaly aıaqtalady», degen Jambyl oblysynyń ákimi Kárim Kókirekbaev qaıbir kúni osy tender jumysyn pysyqtap, birqatar basshylardy tyǵyryqqa tiredi. Shynynda, sonaý qara kúzge deıin sozylatyn qurylystardyń qalaı bastalyp, qalaı bitetinin osy konkýrstardyń qaı ýaqytta ótýinen-aq bile berýge bolatyn sııaqty. Qurylysy tym uzaqqa sozylyp ketken nysanda qaıbir sapa bolsyn?! Bıyl Jambyl oblystyq qu­rylys, jolaýshylar kóligi jáne avtomobıl joldary bas­qarmasy 11,6 mlrd. teńgeni quraı­tyn 203 lot boıynsha satyp alý josparyn ázirlepti. Onyń ishinde 10,1 mlrd. teńgeni quraıtyn 155 lot boıyn­sha kelip túsken ótinimderdiń bar­lyǵyna konkýrstar jarııalandy. Bul 76,4 paıyzdy quraıdy. О́tinimder usynylmaǵan lottar sany – 48. Arqany keńge sal­ǵan Jambyl men Jýaly aýdandary 5 lottan, Sarysý – 8 jáne T.Rysqulov aýdany 4 lotqa ótinimder usynbaǵan. – Konkýrs ótkizý barysynda myna kemshilikter jyl saıyn, tipti júıeli túrde kezdesedi dep aıtýǵa bolady, – deıdi bul jóninde Jambyl oblystyq qurylys, jolaýshylar kóligi jáne avtomobıl joldary basqarmasynyń basshysy Rahmanqul Baıtelıev. – Olar, memlekettik satyp alý veb-portalyna aqparatty durys ornalastyrmaý, ıaǵnı somasyn, atqarylatyn jumys merzimin durys engizbeıdi. Qurylys ju­mystary jobalarynyń elektrondy nusqasy tolyq bolmaıdy jáne der kezinde usynylmaıdy. Sondaı-aq, tapsyrys berýshiniń elektrondy sandyq qoltańbasy bolmaıdy. Osynyń saldarynan 2015 jyl­dyń jeltoqsan aıynan be­ri tapsyrys berýshiler, ıaǵnı Shý qalasyndaǵy «Baldáýren» balabaqshasynyń jáne Jýaly aýdany ákimdiginiń qurylys bólimi basshylarynyń jáne birde-bir mamanynyń elektrondy sandyq qoltańbasynyń bolmaýynan memlekettik satyp alý jospary veb-portalǵa ornalastyrylmaı, konkýrs jarııalanbaýda. Árıne, buǵan aýdan ákim­deriniń de aıtary bar. Olardyń ýájderine qaraǵanda Jambyl oblystyq qurylys, jolaýshylar kóligi jáne avtomobıl joldary basqarmasy men aýdan ákimderiniń bul máseledegi málimetteri eki túrli eken. Basqarma basshysy «konkýrstardyń áli birazy jarııalanbady» dep, qara aspandy tóndirse, aýdan basshylary «qujattardyń bárin usyndyq, birdi-ekili ǵana konkýrstar qaldy» dep, bul tirlikti bittige sanap otyr. Áıtse de basqarma basshysy R. Baıtelıevtiń «Qujattardy jıyp ákep, basqarmaǵa ótkize salýmen is bitpeıdi. Memlekettik satyp alý veb-portalda jaryq kórgen kezde ǵana jarııalanǵan bop esepteledi», degeni senimdi shyqty. Osydan-aq, aýdandyq ákimdiktegilerdiń áli de mem­lekettik satyp alý isin jaqsy meń­germegendikteri baıqalady. Qalaı aıtsaq ta, Jambyldyń sharýasyn jap-jaqsy-aq dóń­geletip kele jatqan oblys áki­mi K.Kókirekbaevtyń bul sa­lany qam­shylap, tezge salyp, tezdetýiniń jemisin kúzde kóre­tin bolamyz. Oralhan DÁÝIT, «Egemen Qazaqstan». Jambyl oblysy.