Aýyldastarymnyń qınalýyna jol bermeımin

Álemdegi qarjy daǵ­da­rysyna baılanys­ty oqı­ǵalardy qarap oty­ryp, bizdiń elimiz­degi tynyshtyqqa, halyq­tyń turmysynyń turaq­tylyǵyna shúkirshilik etemiz. Buǵan árıne, Elbasynyń daǵdarysqa qarsy is-sha­ra­lardy erte bastan qolǵa alyp, Úkimetke naqty baǵ­darlamamen jumys jasaýdy tapsyrýy­nyń ózindik septigi tıip otyrǵany daýsyz. Bul sársenbi kúngi Elbasy qatysqan jınalysta kezekti kórinisin tapty. О́zim negizin qalaǵan «Dastan» sharýa qojalyǵy 2002 jyly quryldy. Sodan beri Mahambet aýdanynda tórt túlikti óz tólinen kóbeıtip qana qoımaı, tuqymyn da asyldandyrý isin qolǵa aldyq. Áýeli Batys Qazaqstan oblysynda asyl tuqymdy mal ósiretin sharýashylyqtan ózimizge qajetti maldy satyp alǵanbyz. Keıin onyń tuqymyn asyldandyrýdy da qat-qabat júrgize bastadyq. Qazir bizdiń sharýashylyǵymyzda qoı men sıyrdyń asyl tuqymdy toby qalyptasty. Sonymen birge, óńir turǵyndaryna sapaly aýyl sharýashylyǵy ónimderin usyný úshin baqsha jáne kókónis daqyldaryn ósirýdiń qyr-syryn meńgerdik. Jaz boıy tamshylatyp sýarý arqyly ósirilgen qyryqqabat, qaýyn men qarbyz, qyzanaq sekildi ónimderdi tutynýshyǵa usynyp kelemiz. Ras, buryn Mahambet aýda­nynyń Aqjaıyq aýyldyq okrýgi aýmaǵynda ósirilgen aýyl sharýashylyǵy ónimderin Atyraý qalasyna deıin jet­kizýdiń qıyndyǵyn kóretin edik. О́ıtkeni, Jaıyq ózeniniń bizdiń okrýg ornalasqan ja­ǵynan Atyraý qalasyna deıin qatynaıtyn kúre jol birneshe jyl boıy jóndeý kórmeı, ábden oıdym-oıdym shuńqyrǵa aınalǵan-dy. Sol sebepten ósirgen ónimimizdi Jaıyqtyń kelesi betine qaltyldaǵan qaıyq­pen ótkizip, Oral – Atyraý jolymen jetkizip júrdik. Bul bizge úlken qıyndyq týdyrdy. Birinshiden, Jaıyq ózeni ústinen qaıyqpen ótý qaýipti bolsa, ekinshiden, biraz ýaqytymyzdy tekke joǵaltýshy edik. Sońǵy jyldary Elbasynyń tapsyrmasymen Inder – Atyraý baǵytyndaǵy sol jolǵa kúrdeli jón­deý júrgizilip, sol bir qıyndyqtan qutyldyq. Qazir sharýashylyǵymyzdyń tir­ligi túzeldi. Memlekettiń tarapynan alatyn sýbsıdııamyz da bar. Endi qolǵa alǵan isimizdi keńeıtýdiń de jobasyn iske asyrýǵa kiristik. Sóıtip, mal bordaqylaý keshenin turǵyzýdyń qamyndamyz. Munda mal soıylady, mal eti óńdeledi. Kókónis jáne baqsha ónimderin saqtaıtyn qoımany da iske qosamyz. Bul kúnderi bizdiń sharýashylyǵymyzda ózim ósip-óngen okrýgimnen 25 adam turaqty jumyspen qamtyldy. Olardyń turmysyn túzeýine de qoldaýymyzdy kórsettik. Sharýashylyǵymyzdyń qurylǵanyna 10 jyl tolýyna oraı úzdiksiz 10 jyl jumys jasaǵan aýyldastaryma kólik syıladyq. Keıbirine turǵyn úıler salyp berdik. Endi bıylǵy jyldyń aıaǵyna taman mal bordaqylaý kesheni iske qosylǵanda taǵy da 50-ge jýyq adamdy turaqty jumyspen qamtýdy kózdep otyrmyz. Budan bólek bizde ár jyl saıyn kóktem jáne jaz aılarynda kókónis pen baqsha daqyldaryn ósirýge baılanysty qosymsha 30-ǵa jýyq adamdy naýqandyq jumystarmen qamtımyz. Bizdiń Aqjaıyq okrýginde de turmysy tómen otbasylary, zeınetkerler turady. Olarǵa turmysyna qajetti azyq-túlikpen, keıbirine jem-shóppen kómektesip turamyz. О́ıtkeni, bizdiń de kindik qanymyz sol aýylda tamdy, sol topyraqta óstik. Sol okrýgte sharýashylyǵymyzdy órkendetip, tabys taýyp otyrmyz. Biz ózimizdi sol aýyldyń turǵyndarynan eshqashan bólektegen joqpyz. О́zimizde jumys isteıtin adamdardyń, jalpy, aldaǵy ýaqytta aýyldastarymyzdyń turmysy tómendemeýi úshin barlyq múmkindikti qarastyra beremiz. Bul túptep kelgende, eldiń áleýmettik ahýalyn jaqsartýǵa qosatyn úlesimiz bola beredi. Qonys ERMANOV, «Dastan» sharýa qojalyǵynyń quryltaıshysy, «Qurmet» ordeniniń ıegeri. Atyraý oblysy.