Ekonomıkalyq áleýet kúsheıtiledi

Qazir serpindi ister ýaqyty. Elbasy Nursultan Nazarbaev Úkimettiń jýyrdaǵy keńeıtilgen otyrysynda daǵdarystyń qandaı jaǵdaıynda bolmasyn qarqyndy tómendetpeı, qaıtarymnyń eselene túsýin talap etti. Bul oraıda, Kókshetaý qalasynyń ekonomıkalyq áleýeti artyp otyrǵanyn aıtqym keledi. Mysaly, ótken jyly ekonomıkanyń naqtyly sektorynda ónerkásip kásiporyndary 79,8 mıllıard teńgeniń ónimi óndirildi. Al ındýstrııalandyrý kartasy boıynsha 2,8 mıllıard teńgeniń eki jobasy júzege asyp, jańa jumys oryndary ashyldy. Bizde «Bıznestiń jol kartasy-2020» baǵdarlamasy aıasynda 1 mıllıard 135 mıllıon teńgeniń 61 jobasy maquldanyp, tórt ınvestısııalyq joba jumysyn bastady. Negizgi kapıtalǵa salynǵan ınvestısııa 27,9 mıllıard teńgeni qurady. Bul osynyń aldyndaǵy jylǵa qaraǵanda edáýir artyq. Qurylys salasynda da jumys jandandy. Oblys ortalyǵynda 124,3 myń sharshy metr turǵyn úı paıdalanýǵa berilip, «Qoljetimdi baspana» baǵdarlamasymen 768 otbasy páter kiltterin aldy. Memleket basshysy daǵdarys ýaqytynda otandyq ekonomıkany qoldaýǵa eleýli qarjy bólinýi Ulttyq qordy der kezinde qurýdyń, zeınetaqy júıesin jáne jalpy ekonomıkany reformalaýdyń, sondaı-aq, teńgeniń erkin baǵamyna kóshýdiń arqasynda múmkin bolǵanyn jáne bólinip otyrǵan qarjynyń tıimdi ıgerilýin eskertti. Osynyń arqasynda halyqty jumyspen qamtý, áleýmettik qoldaý, bilim, densaýlyq jáne mádenıet salasynda birshama ilgerileýshilik baıqaldy. Adamdardy kóbirek tolǵandyratyn kommýnaldyq salanyń jumysy jaqsarǵanyn qala turǵyndary jaqsy biledi. Ásirese, jylýmen qamtamasyz etý máselesiniń oıdaǵydaı sheshimin tapqanyn atap ótken jón. Qalany kórkeıtý máselesi boıynsha da kóp ister tyndyryldy. Kókshetaý qalasyn ortalyqtandyrylǵan gazben qamtamasyz etý sońǵy jyldary oń sheshimin taba bastady. Qala ákiminiń esep berý kezdesýinde qorytyndy sóz sóılegen oblys basshysy Sergeı Kýlagın jurttyń nazaryn qazirgi jahandyq qarjy daǵdarysy kezinde tyǵyryqtan qalaı shyǵý kerek degen saýa­l tóńireginde áńgime qozǵady. Bul rette Elbasynyń strategııalyq bastamalarynan týyndaǵan mindetterdi júzege asyrýdyń naqtyly baǵyttaryn anyqtap berdi. Ásirese, oblys ortalyǵynyń óńirdiń ekonomıkasyn alǵa súıreýde kóshbasshy ekenin aıta kelip, ár saladaǵy damý úrdisteri ýaqyttyń yrǵaǵynan qalmaýy kerektigin eske salyp ótti. «Biz erteńgi kúnge senimmen qaraýymyz kerek» degen másele qala turǵyndaryn jańa qozǵalystarǵa bastaýda. Osynyń ıgi nátıjesi retinde, daǵdarys ataýly aıaqqa oralǵy bolyp jatsa da, bizdiń óńir serpilis tanytyp, alǵa jyljyp kele jatqany aıqyn baıqalady. Ermek MARJYQPAEV, Kókshetaý qalasynyń ákimi. Aqmola oblysy.