Baıqap sóılemeseń, bálege ushyraısyń

Osydan biraz buryn Serbııa parlamenti eldiń qorǵanys mınıstri Bratıslav Gashıchti ornynan aldy. Eldiń qorǵanys qabiletin álsiretkeni úshin emes, bir jýrnalıst áıeldiń orynsyzdaý ótinish-suraǵyna orynsyzdaý ázil jaýap qatqany úshin. Mundaıda qazaqtar «Basqa pále – tilden» deıdi. Sóıtip, serbterdiń qorǵanys mınıstri Gashıch ne aıtyp, aýzy­nan qalaı qaǵyndy? Tipti, bul jańa jyldan buryn jeltoqsanda bolǵan edi. Sodan, dúrmek, aı­qaı-shý búginge jetip otyr. Son­da bir aqparat quraldary qyzmet­kerlerimen kezdesý kezinde B92 deıtin basylymnyń jýrnalısi qorǵanys mınıstriniń aldyna kelip, tizerlep turyp, operator kamerasyn kólegeılemeýin óti­nedi. Bálkim mınıstr Gashıch jýrnalıstiń tizerlegenin ázilge de burǵan shyǵar: «Jýrnalıst qyz­dardyń op-ońaı tizerleı sal­ǵanyn unatamyn-aq» deıdi. Árıne, resmı adam úshin orynsyzdaý jaýap qoı. Ásirese, ilik izdeıtinderden saqtanǵany jón edi. Sóıtse de, bizdiń áriptesimizdiń de, resmı adamnyń aldyna tizerleı qalyp, ótinish aıtýyn tapqyrlyq deı almaısyń. Tipti, muny aran­datýǵa jeteleıtin de áreket dep aıtýǵa bolar edi. Mınıstr Ga­shıchtiń arandap qalǵany anyq. Bul jaǵdaıdy oǵan qarsylar qapy ji­bermeıdi. Jýrnalıster arasynda biraz sóz bolyp edi, ony basqalar da qoldaı ketti. Sirá, qorǵanys mınıstrine tis qaıraǵandar az bolmasa kerek. Bul jýrnalısterge de dem berdi: jańa jyldyń aldynda Serbııanyń biraz qalalarynda jýrnalıster kóshege shyǵyp, mınıstrdi otstavkaǵa jiberýdi talap etti. Is nasyrǵa shaýyp bara jat­qa­nyn ańǵarǵan parlament talqylaýǵa májbúr boldy. Na­syrǵa shabady degende, qolynda pikir týdyrý múmkindigi bar aq­parat quraldary budan keıin de shýlaı berýi múmkin. Munyń árıne qajeti joq. Al parlamenttegi talqylaýdyń ońaı bolmaǵany ańǵarylady. Talqylaýdyń qalaı ótkeni bizge belgisiz. Bizge jetken habar boıynsha ol segiz saǵatqa sozylypty. О́z sózinde eldiń premer-mınıstri Aleksander Výchıch qorǵanys mınıstrin otstavkaǵa jiberý áste de onyń qyzmetine baılanysty emes, «ádep, syılastyq, qurmet máselesine» baılanysty ekenin atap kórsetýdi ótinipti. Osyǵan qaraǵanda, Gashıchti bosa­týǵa qarsylar da az bolmaǵan sııaq­ty. Degende, bul talaı adamǵa sabaq bolatyn shyǵar. Bir nárseni kórip, ekinshi nárse eske túsedi degen bar. Osyǵan bir­shama uqsas jaı osydan eki jyl buryn 18 sáýirde Reseıdiń Memdýmasynda da ótken. Sondaǵy bir baspasóz ókilderimen kezdesýde «ataqty» Vladımır Jı­rı­novskıı «Rossııa segodnıa» agent­tiginiń jýrnalısine (onyń aıaǵy aýyr eken) ózine unamaıtyn suraq qoıǵany úshin qaıtalap aıtý qıyndaý sózdermen jer-jebirine jete aıqaılaǵan. Sol áıel jýrnalıstke taǵy bir áıel jýrnalıst ara túskende LDPR kósemi tipti qutyrynyp ketken. Ádep kerek, qurmet kerek. Ol ózi kóbine sózden bastalady. Sózben bireýdiń kóńilin de kóte­resiń, balaǵatpen kóńilin de óshiresiń. Serbııa Skýpshınasy biraz jurtqa sabaq bolǵandaı sheshim qabyldady. Adamnyń óz aýzyna abaı bolǵany jón.