Veronıkanyń oryndalǵan armany

Qazir kópshilik adamdarǵa bıznes degen sóz qol jetpes bıik­tegi nárse sekildi kórinedi. Sondyqtan olar is ashý úshin táýe­kel jasaýǵa tartynshaqtaıdy. Alaıda óz atelesin ashqan Ve­ronıka Pobrýs mundaı pikirmen kelispeıdi. Erinbeı eńbek etip, súıgen isiniń sońyna túsken kisi ǵana kásibin dóńgeletedi. Uly áje­sinen nemere, shóberelerine jalǵasyp kele jatqan tiginshilik Veronıkanyń da súıgen isi bolatyn. Tulymshaǵy jelbirep júrgen bala kezinde ájesi Raısa Ilınıchna Bebeh alańsyz ti­gin mashınasynda otyratyn. Ne­me­resi de ony aınalshyqtap, matalardy ustap kórip, qaıshymen mata qyrqamyn dep qıǵylyqty salar edi. Ájesine ıne sabaq­tap beretin kezderi de bolatyn. «Ana kórgen ton pisher» degen qa­zaq maqalynyń danalyq ekenin Bebehter otbasynyń sabaqtastyq dástúri de dáleldegendeı edi. Ájesinen tiginshilikke kózi qanyp ósken Veronıka 9-synypta oqyp júrgende ózine alǵashqy paltosyn tigip aldy. Sodan keıin-aq onda basqa mamandyq týraly oı bolǵan emes. Tigin mashınasynda saǵattap otyrady, tikken ár kıimi oǵan rahat sezimin syılaıtyn. Tiginshilik kásibine, kún kórisine aınaldy. Beri kele atele ashýdy armandady. – Jyldar jyljyp óte berdi. Men suranys jasaǵandarǵa bu­ıym­­­daryn úıden tigip bere­tin­min. Al atele ashý men úshin ar­man kúıinde qala bergen edi. Sebebi, barlyǵy da qarjyǵa kelip tireledi ǵoı. Birde maǵan tanys­tarym «Kásipkerler palatasyna baryp, josparyńdy aıtsań kómek beredi, talpynyp kórseı», degen keńes aıtty. Rasynda Ká­sip­­kerler palatasyna barǵan soń, aıym ońynan týǵandaı boldy, armanymnyń aldamaǵanyn sezindim, – deıdi Veronıka. Qazir Veronıkanyń ózi turyp jatqan Maı selosynda ashqan atelesi jumys isteı bastady. Tiginshi bıznesim júrmeı qalady dep sasqan joq. О́ıtkeni, ol úıinde tigin tigip júrgende-aq oǵan sándi kóılekke, basqa da kıimder tigýge suranys beretinder az bolmaıtyn. Atele ashylǵaly kelýshiler qatary kóbeıe tústi. Suranys berýshiler kelgen saıyn onyń kásibi de dóńgelene túsedi. – Atele ashylǵan kúnnen-aq aýyldastarym maǵan kúzgi, qysqy kıimderin jóndetýge alyp keldi. Alǵashqy suranys ta osy boldy. Bul úırenshikti kó­rinis, óıtkeni qalada da, dalada da jamaý-jasqaý isi bolmaı qalmaıdy. Tipti, dúkennen satyp alǵan kıimniń ózin keıde kishireıtýge, qysqartýǵa týra keledi. Tirliktiń bir úzilmeıtin isi osy, – deıdi Veronıka. Tiginshi qyz aýdandaǵy na­­­­ryqty «zerttep» te qoıǵan eken. Taran aýdanynyń orta­ly­ǵynda, oǵan jaqyn eldi mekenderde mundaı atele joq eken. Keıbir áýesqoı tiginshiler qoly bos kezinde úıinde tigedi. Al Ve­ronıkanyń atelesine kelgender negizinen kıimdi jóndetedi, jamaý-jasqaý degendeı isterdi at­qarady. Aldaǵy ýaqytta ol ate­leniń qyzmet aıasyn keńeıtý­di oı­lastyryp otyr. Onyń ózi oılaǵan isin oryndaýǵa biliktiligi jetedi. Veronıka Rýdnyı qala­syndaǵy bir avtorlyq mektepten mamandandyrylǵan tiginshilik kýrsty bitirip, sertıfıkat aldy. «Sheberdiń qoly ortaq» degendeı, ol aýyldastarynyń qandaı kıimin bolsa da jutyndyryp shyǵarady. Búginde Veronıka Pobrýs «Bız­nestiń jol kartasy-2020» baǵ­darlamasy boıynsha shaǵyn nesıe kútip júr. Ol sol qarjyǵa jańa tigin mashınasyn, fýrnıtýra, qosymsha jabdyqtar alǵysy keledi. «Veronıka» atelesiniń jer­lesterine kórseter qyzmeti minsiz bolatynyna Veronıka senimdi. Názıra JÁRIMBETOVA, «Egemen Qazaqstan». Qostanaı oblysy, Taran aýdany.