Jedel járdemge – jańa tynys

Semeıde jedel medısınalyq járdem stansasy halyq ıgiligine paıdalanylýǵa berildi. Jańa densaýlyq saqtaý mekemesiniń ashylýyna Semeı qalasynyń ákimi Ermak Sálimov qatysty. – Bul qala ómirindegi eleýli oqıǵalardyń biri, – dedi qala ákimi. Osy jańa jedel me­dı­sı­na­lyq járdem stansasynyń densaýlyq saqtaýdaǵy kóptegen túıtkildi máseleler­di sheshýge septigin tıgizetini anyq. Tek osy jeltoqsan aıynyń ózinde biz qala kóleminde birneshe áleýmettik nysandardy ashyp, paıdalanýǵa berdik. Máselen, 2015 jyly 13-ke tarta balabaqsha halyq ıgi­ligine berildi. Jedel medısınalyq járdem stansasynyń ashylýy sonyń zań­dy jalǵasy ispetti. Osynaý jaýapty mamandyq jo­­­­lynda qyzmetterińiz adal, kásipterińiz ońdy bolsyn degen tilek bil­diremin. 2016 jyly da osy baǵyttaǵy jumystar jal­ǵasyn taýyp, jańa jobalar sátti júzege asatyny sózsiz. Budan soń medısına salasynda uzaq jyldar eńbek etken ardager Elena Baten­ko­va jańa nysan­nyń paıdalanýǵa berilýi qalalyqtar úshin óte durys ekenine toq­ta­lyp, adam ómirine arashashy aq jeleń jandar­dyń jumysyna jyly lebizin bil­dirdi.­ Jańa jedel medısınalyq járdem stansasy «Salamat­ty Qazaqstan» memlekettik baǵ­­dar­lamasy aıasynda iske qosylǵan eken. Qurylys jumys­tary osydan eki jyl buryn bastalǵan bolatyn. Jobanyń jalpy quny 1 mlrd. 538 mln. 278 myń teńgeni qurap otyr. Munda álemdik standarttarǵa sáıkes sońǵy úlgidegi qurylǵylar paıdalanylady. Olardyń qa­taryna KI-3M ottegili ıngalıator, DKI-N-10 defıbrıllıa­tor-monıtory, Alton-103 úl­gisin­degi EK12T elektrokardıo­grafy. Búginde Semeı qalasy turǵyndarynyń sany 350 myńnan asyp jyǵylady. Sondyqtan, ja­ńa­­dan ashylǵan jedel járdem stansasy turǵyndarǵa der kezinde shuǵyl kómek kórsetý baǵytynda jumys jasaıtyn bolady. Bul óz kezeginde aq halattylardyń jumysyn ońaılandyryp, qyz­met kórsetý sapasyn arttyra túsetini anyq. Jedel járdem stan­sa­synyń ǵımaraty úsh korpýstan turady. Munda dıspetcherlik qyzmetke navıgasııalyq júıemen jabdyqtalǵan keń jaıly oryn qarastyrylǵan eken. Buǵan qosa ujym qyzmetkerlerine de barlyq jaǵdaı talapqa saı jasalǵan. Al túrli jıyn, basqosýlardy ótkizýge arnalǵan konferens-zaldyń syıymdylyǵy 150 adamǵa arnalǵan. Raýshan NUǴMANBEKOVA, jýrnalıst. Semeı. Sýretti túsirgen avtor.