Partııa qatary jastarmen tolyqty

Parlament Májilisi men máslıhattar saılaýlaryna úmitkerler úgit-nasıhat sharalaryn júrgizýge belsene kirisip ketti. Úlken saıası dodaǵa túsken «altylyqtyń», ıaǵnı 6 partııanyń sanatynda Jalpyulttyq sosıal-demokratııalyq partııa da bar. Ortalyq saılaý komıssııasy partııa tarapynan usynylǵan 23 úmitkerdi tirkeýden ótkizip, jerebege sáıkes Jalpyulttyq sosıal-demokratııalyq partııa saılaý bıýlleteninde besinshi orynda tur. Jalpyulttyq sosıal-demo­kra­tııalyq partııanyń (JSDP) saılaýaldy baǵdarlamasyna saı alǵashqy ótken Almatydaǵy basqosýynda jas býyn ókilderi partııa qataryna qabyldandy. О́z jaqtastarymen emen-jarqyn ashyq áńgime barysyndaǵy ótken bul shara elimizdegi oppozısııalyq partııanyń saılaýǵa qulshynysynan habar bergendeı. Almaty qalalyq fılıalynyń jetekshisi Tazabek Sámbetbaıdyń aldaǵy qyzý naý­qandaǵy uıymnyń kózdegen maq­saty týraly tolǵana sóılegen sózi de kópshiliktiń kóńiline qonǵan sekildi. Eger saılaýda úmitkerler jeńiske jete qalsa, Parlamenttiń bıik min­berinen partııanyń qoıatyn kókeı­kesti halyqtyq máselelerdiń aýqy­my barshylyq. Osyǵan oraı sheshen par­tııanyń óz saılaýshylaryna usynyp otyrǵan sharalar keshenine keńinen toqtaldy. Ol negizinen alǵanda áleýmettik, ekonomıkalyq jáne saıası salany qamtıdy. Árbir partııa saıası dodada óz ustanymyn naqtylaıdy emes pe. Bul turǵydan alǵanda, partııanyń saı­laýaldy baǵdarlamasynda aıqyn­dalǵanyndaı, «JSDP óziniń kóp jyl boıy usynyp kele jatqan qaıta qurýlardy júzege asyrýǵa bılikti kóndirý, elimizdiń ishki tiregin bekitý, Qazaqstandy ekonomıkalyq jaǵynan pármendi, áleýmettik jaýapkershiligi bar, tabys­ty erkin, shyn máninde turaqty jáne táýelsiz memleket etý úshin Parlament Májilisi saılaýyna qatysady». «El tańdaýy – halyq bıligi!» degen uranmen shyqqan JSDP áleýmettik salada elimizde álemdik tájirıbeni paıdalaný kerektigin alǵa tartady. Máselen, baıyǵan azamattar belgili bir somadan tys tapqan tabystarynyń 50-60 paıyzyn qazynaǵa quıýy tıis. Qany qyzý bir partııa múshesi atyp turyp partııa ishindegi alaýyzdyq pen ótken tarıhı kezeńdegi ekige jarylý jaıyn daýlamaq bolǵan edi, jınalys tóraǵasy oǵan da laıyqty toıtarys berdi. Bul saılaýda partııa jastar qanatyna arqa súıep otyrǵanyn jetkizdi. Partııanyń jas múshesi Ánýar Shotbaı óziniń partııa aldyndaǵy qyzmetin tarıhı «Alash» partııasynyń rýhanı jalǵasy sıpatynda jal­ǵas­tyratynyn aıtty. Ánýar Shotbaıdyń áriptesi Qýat Kúnbolat ta óziniń sózinde maqsaty elge qyzmet etý bolyp tabylatynyn málimdedi. Partııalas serik­teriniń oıy kóp jaǵdaıda bir jer­den shyǵyp jatqany kóńilinde rıza­shylyq sezimin týǵyzatynyn bil­dir­di. Onyń tııanaqty qurǵan oıly le­bizderine partııa músheleri rıza­shylyq tanytty. Jalpyulttyq sosıal-demo­kra­tııalyq partııany ózindik baǵyt-baǵ­dary úshin jan-júregimen qol­daı­­tynyn bildirgen taǵy bir jas Mádı Omarov óziniń lıberaldyq kóz­qarasta qalatynyn bildirdi. Solaı bola tura, Mádı Omarov bir top jas zamandastarynyń sapynda partııa qa­taryna ótti. Jastarǵa Jalpyulttyq sosıal-demokratııalyq partııanyń mú­shesi ekendigin bildiretin qujat tapsyryldy. – О́rkenıetti eldiń bolashaǵy – siz­der­sizder! Týǵan elimizdiń bolashaǵy úshin, jarqyn keleshegi úshin kúreste bir­ge bolaıyq, jeńiske birge jeteıik! – dedi tóraǵa partııa qataryna kelip qosylǵan jastar legin shyn júrekten quttyqtap. Talǵat SÚIINBAI, «Egemen Qazaqstan». ALMATY.