Elimizde jumyssyzdarǵa járdemaqy tóleý merzimi 6 aıǵa deıin uzartylady

ASTANA. 23 aqpan. Qazaqstanda jumyssyzdarǵa járdemaqy tóleý ýaqyty 6 aıǵa deıin uzartylady. Bul týraly NewTimes.kz-ke silteme jasaǵan egemen.kz tilshisi habarlady. Densaýlyq saqtaý jáne áleýmettik damý vıse-mınıstri Birjan Nurymbetov kásiporyndarda qysqartýǵa baılanysty jumysynan aıyrylǵandarǵa áleýmettik tólemder berý merzimi jarty jylǵa deıin sozylǵanyn málimdedi. Búgin Parlament Senaty Áleýmettik-mádenı damý jáne ǵylym komıtetiniń keńeıtilgen otyrysy ótip, onda «Halyqty jumyspen qamtý týraly» zań jobasy qaralǵan bolatyn. Jıyn barysynda Birjan Nurymbetov qysqartýǵa oraı jumyssyz qalǵan tulǵalarǵa qatysty zańǵa ózgerister engizilgenin habarlady. Osylaısha járdemaqy tóleý merzimi 4 aıdan 6 aıǵa deıin uzartyldy. Vıse-mınıstr jumys berýshiniń áleýmettik saqtandyrý qoryna 5 paıyz kóleminde áleýmettik tólem jiberetinin, al jumysshynyń osy júıeniń qatysýshysy ekenin túsindirip ótti. «Bizde jumyssyzdardy tirkeý tártibi az-kem ózgertildi. Aldymen ony jumys izdep júrgen tulǵa retinde esepke alyp, 10 kún kóleminde oǵan jumys izdeımiz. Eger jumys tabylmasa, ony jumyssyz retinde tirkeýge alamyz. Jumyspen qamtý organdary jumyssyz azamattarǵa bos oryndarǵa joldama beredi, ol sol jaqqa baryp, áńgimelesýden ótý kerek», – dep túsindirdi Densaýlyq saqtaý jáne áleýmettik damý vıse-mınıstri. Onyń sózine qaraǵanda, qalada turatyn jumyssyz ár 10 kún saıyn jumyspen qamtý ortalyǵyna kelip, óziniń jumys izdep júrgeni týraly habardar etip otyrýy kerek. Al aýyldy jerlerde jumys izdegender aıyna bir ret aýyl ákiminiń aldyna barýy qajet. Elaman Qońyr. Derek: NewTimes.kz. Sýret: ya2016.com.