Qurysh qulaqty Berik

El ishinde erekshe adamdar kóp qoı. Ádette adamdar qary talǵansha, kir tastaryn qoldarymen kezek-kezek kóterip, eldi tańǵaldyryp jatady emes pe?! Al Jambyl oblysy, Qarataý qalasynyń turǵyny Berik Ábilhanuly osynaý zil batpan kir tastaryn qulaqtarymen kóteredi. Tipti 26 kıloǵa deıingi kir tastaryn qulaǵymen kóterip, qulaǵymen kólik te súıreıdi. Jastaıynan sportty serik etken Berik – búginde Qarataý qalalyq sport mektebinde shahmat jáne doıby oıyndary boıynsha jattyqtyrýshy. – Alǵash ret ákimshilik ǵıma­raty­nyń aldynda jınalǵan jurtshy­lyqtyń kózinshe bir kólikti 3 metrge deıin qulaǵymmen súırep kórdim. Bul ónerime ózim de tańǵaldym. Qazir jattyǵýlardyń arqasynda 3-5 metr­ge deıin tarta beremin, – deıdi bul jóninde Berik Ábilhanuly. Aýyldaǵy aǵaıyn Berikti «Qurysh qulaqty Berik» dep ataıdy eken. «Ákem dánekerleýshi bolyp jumys isteıtin. Sodan, jasymyzǵa qaraı túrli salmaqta kóterip shynyǵatyn kir tastaryn jasap beretin. Sony kóterip, shynyǵyp óstik. Men bul ónerim arqyly jas urpaqqa aldyńa maqsat qoıyp, talmaı jattyqsań, armanyńa qol jetkizesiń degendi uqtyrǵym keledi. Úsh qyz, eki ul tárbıelep otyrmyn. Bir balam osy ónerimdi jalǵastyryp, ol da qulaǵymen kir tasyn kóteredi», – deıdi qurysh qulaqty Berik. Oralhan DÁÝIT, «Egemen Qazaqstan». Jambyl oblysy.