ASTANA. 24 aqpan. Búgin ÝEFA Chempıondar lıgasynyń 1/8 fınaly sheńberinde eki oıyn oınaldy. Atap aıtqanda, «Arsenal» óz alańynda «Barselonadan» 0:2 esebimen jeńilse, «Iýventýs» pen «Bavarııa» 2:2 esebimen teń tústi. Bul týraly egemen.kz tilshisi habarlady.
«Arsenal» (London, Anglııa) – «Barselona» (Barselona, Ispanııa) 0:2
Goldar: Lıonel Messı 71, 83 (penaltı).
Londonda ótken «Arsenal» – «Barselona» kezdesýinde Ispanııadan kelgen komanda aıqyn basymdyq tanytty. Statıstıkalyq kórsetkishterge kóz júgirter bolsaq, qaqpaǵa jasalǵan soqqylar boıynsha katalonııalyqtar Petr Chehtiń ıeligin 11 ret nysanaǵa alsa, alań ıeleri 4 soqqymen ǵana qarymta qaıtardy. Sondaı-aq, oıyn barysynda dopqa ıelik etý kórsetkishinen de «Barselona» basym tústi (66% – 34%).
Bul basymdyq óz nátıjesin berip, qonaqtar Messı soqqan eki goldyń arqasynda jeńiske jetti. Álemniń eń úzdik oıynshysy aldymen 71-mınýtta mergendigimen kózge tússe, 83-mınýtta penaltıden gol soǵyp, dýbldiń avtory atandy.
Qarymta kezdesý 16 naýryzda Barselonada ótedi.
«Iýventýs» ( Týrın, Italııa) – «Bavarııa» (Mıýnhen, Germanııa) 2:2
Goldar: Paýlo Dıbala 63, Stefano Stýraro 76 – Tomas Mıýller 43, Aren Robben 55.
«Iýventýs» pen «Bavarııa» arasyndaǵy match ta asa tartysty ótti. Mıýnhendikter birinshi taımnyń sońynda, ıaǵnı 43-mınýtta Tomas Mıýllerdiń kómegimen esep ashqan bolatyn. Al ekinshi taımda, naqty aıtsaq, 55-mınýtta Aren Robben esepti eseledi.
О́z jankúıerleri aldynda namysqa tyrysqan týrındikter oıyn sońyna deıin tarazy basyn teńestirip úlgerdi. Aldymen 63-mınýtta Dıbala esep aıyrmasyn qysqartsa, 76-mınýtta Stefano Stýraro komandasynyń ekinshi golyn soqty. Qalǵan ýaqytta tablodaǵy esep ózgermeı, oıyn teń aıaqtaldy.
Bul komandalardyń qarymta kezdesýleri 16 naýryzda Mıýnhende ótedi.
Elaman Qońyr.
Derek: egemen.kz.
Sýret: championat.com, AFP.
