«Káýsarym»

Stýdent óz aýyly týraly túsirgen shyǵarmasyn osylaı atady Qostanaıda «Káýsarym» atty qysqa metrajdy fılmniń tusaýkeseri ótti. Onyń rejısseri Jánibek Kárbozov Temirbek Júrgenov atyndaǵy Qazaq ulttyq óner akademııasynyń 2 kýrsynda oqıdy. Stýdenttiń bul shyǵarmasy Feısbýk áleýmettik jelisi arqyly kórermenderdiń súıispenshiligine ıe bolyp úlgeripti. Jarty saǵattan sál asatyn fılmniń mazmuny da kúrdeli emes, biraq aıtary bar – aýyldyń gúldengen erteńin armandaıdy. Qalada kompıýtermen tel ósip jatqan Bekjandy qysqy kanıkýl bastalǵanda anasy «meniń aýylǵa barǵym kelmeıdi, onda ne qyzyq bar?» degenine bolmaı, qulaǵynan súıregendeı etip aýylǵa alyp keledi. Torǵaı óńirindegi sonaý Qabyrǵa ózeniniń boıyndaǵy kishkentaı aýylda anasynyń tórkini turady. Qańtardyń qaqaǵan aıazy, qalyń qar jamylǵan aýyl buıyǵyp jatqandaı. Biraq bul syrt kózge ǵana eken. Naǵashysynyń ózi qatarlas jasóspirim uly Aıdarmen birge qys qyzyǵyna toımaıdy. Aıdar jıeni Bekjandy ertip alyp, aýyl balalarymen birge syrǵanaq tebedi, túıege minedi, qoradaǵy jas tólderge qaraıdy, shómeleniń basyna shyǵyp oınaıdy. Qabyrǵa ózenine baryp, aýyl adamdarynyń muzdan balyq aýlaǵanyn qyzyqtaıdy. Aýyl klýbynda aýyldastar jańa jyl shyrshasyn ótkizedi. Aýyl balasy Aıdar qaladan kelgen Bekjanǵa qaraǵanda pysyq, oǵan aýyldyń tarıhyn aıtyp beredi. Osynyń barlyǵy da aýyldan shyǵyp, qazaqtyń atyn kókke kótergen halqymyzdyń talaı myqtysynyń balalyq shaǵyna tán kórinis. Fılmde Bekjannyń aýyldaǵy Káýsar degen qyzǵa balalyq mahabbaty da shynaıy, ádemi sýretteledi. Káýsardyń jeńgesi arqyly halqymyz dástúrleriniń, mineziniń aýylda áli saqtalǵanyn qýana jetkizgendeı bolady. Al appaq qar ústinde balalardyń án, bıin mıýzıkl janrynda berýimen fılm rejısseri búgingi buıyǵy qazaq aýyly qurymaıdy, qaıta gúldenedi degen oı aıtqysy keledi. Bir qyzyǵy, qysqa metrajdy fılmge rejısser Jánibek akter izdemepti. Onda oınap júrgen keıipkerlerdiń barlyǵy da óziniń anasy Saltanat, ákesi Manat, inisi Sárýardan bastap, óziniń aýyldastary, aýyl balalary. Fılmniń tusaýkeserinde oblystyq máslıhat hatshysy Saılaýbek Esjanov, belgili aqyn Aqylbek Shaıahmet jáne taǵy basqalar bolashaq rejısser Jánibek Kárbozovtyń tyrnaqaldy týyndysyna rızashylyǵyn aıtyp, ónerine óris tiledi. Názıra Járimbetova, «Egemen Qazaqstan». QOSTANAI.