Dostyq úıine qosh keldińizder!

Qazaqstan halqy Assambleıasynyń qurylǵanyna 20 jyl tolýyna oraı qala ákimdigi etnomádenı birlestikterge jańadan boı kótergen Dostyq úıin syılady. Al jalpy qaladaǵy Dostyq úıi oblysta alǵash ashylǵan etnomádenı birlestikterdiń birinen sanalady. Bul kúnderi qaladaǵy 12 etnomádenı birlestik tatýlyq pen birliktiń ortasyna aınalǵan. Jarqyrǵan jańa ǵımaratqa kóshken birlestikter, árıne, qala ákimdiginiń syılyǵyna óte qýanyshty. Rıza bolǵan birlestik músheleri aldaǵy ýaqytta túrli mádenı-rýhanı jobalardy qolǵa alyp, kóptegen is-sharalardy atqarýdy josparlap otyr. Jarqyraǵan jańa ǵımarattan slavıan, ýkraın, polıak, nemis, ázerbaıjan, evreı, ózbek, koreı, cheshen-ıngýsh, tatar-bashqurt jáne belorýs birlestikterine jáne musylman áıelderi lıgasyna arnaıy bólmeler berildi. Qazaq tilin, ózge ult ókilderiniń tilderin úırenýge arnalǵan úıirmeler jumys jasaıdy. Túrli is-sharalardy uıymdastyrýǵa arnalǵan keń zal árqashan qonaqtaryn kútedi. Qaladaǵy Dostyq úıiniń etnomádenı birlestikterin jigerli, shyǵarmashyl, yntaly adamdar basqarady. Bári osy elde ómir súrip jatqan soń, Elbasy saıasatynyń birlik, tatýlyq jolyndaǵy bastamalaryn qashanda qoldaıdy. Memleket basshysynyń tikeleı qoldaýymen jarqyraǵan jańa mýzyka mektebi de salyndy. Qazir onda 600-ge jýyq ónerli balalar bilim alýda. Sáýleti qala kórkin ashyp, kóz tartady. О́nerli balalar jyl saıyn ótetin «Dostyq. Birlik. Táýelsizdik» dep atalatyn oblystyq etnomádenı birlestikter festıvaline qatysady. – Jańa qonysqa orna­las­qanymyzǵa óte qýanyshtymyz. Endi jańa ǵımaratta jumys jasaıtyn bolamyz. Erteńgilik bárimiz de kóterińki kóńil-kúımen osynda jınalamyz. Shashý shashylǵan alǵashqy kúndegideı áli de keremet jaqsy áserde júrmiz. О́ıtkeni, Dostyq úıi etnomádenı birlestik músheleriniń ekinshi úıi. Ulttyq birlik – bárimizdiń de tańdaýymyz, tynyshtyq bárimizge kerek. Sondyqtan da bolar, etnomádenı birlestikter qalada ótetin barlyq mádenı-merekelik sharalardan qalyspaıdy. Án-shashýymyz el birligine, Otandy súıýge, patrıottyq rýhty kóterýge, shynaıy belsendilikti arttyrýǵa, qazaq halqymen birge kele jatqan dostyqty dáripteýge arnalady, – deıdi Dostyq úıiniń dırektory Lıýdmıla Makarchýk. Sonymen qatar, Dostyq úıine óskeleń urpaq: balalar men jastar shaqyrylyp, jastar qanatyn nyǵaıtý isi qolǵa alynýda. Búgingi kúni jastar qanaty ár etnomádenı birlestiktiń janynda bar. Mysaly, «Polonııa» atty polıaktar birlestigi balalar ansamblin qursa, «Vozrojdenıe» nemister mádenı birlestigi nemis tilin oqyp-úırenýge kóńil bóledi. «Bratstvo» atty slavıan birlestigi jyl saıyn «Slavıan jazbasy men mádenıetiniń kúnderin» ótkizedi. Basqa birlestikterdiń de óz sharalary bar. – Qala turǵyndary da jańadan ashylǵan Dostyq úıine kelip, qutty bolsyn aıtýda. О́tken aptada oblys ákimi Qanat Bozymbaev kelip, jańa qonysqa qutty bolsyn aıtty. Raýshan gúlderin syılady. Osyndaı oń nıet pen peıil barshamyzdy qazaqstandyq patrıotızm týy astyna biriktiredi, –deıdi L.Makarchýk. Farıda BYQAI, «Egemen Qazaqstan». Pavlodar oblysy, Ekibastuz qalasy.