«Birliktiń» kózdegeni – halyq birligi

«Birlik» saıası partııasynyń Májilis saılaýy naýqanynyń tóte jolyndaǵy bul kezdesýi ózgesheligimen erekshelendi. Tipti, muny «Birlik» partııasy – Oral Tańsyqbaev atyndaǵy sándik-qoldanbaly óner kolledjiniń aýdıtorııasynda sheberlik-sabaǵyn ótkizý sharasyna tikeleı uıytqy boldy degen jón shyǵar. Aldymen bolashaq óner sheberlerine qajetti qylqalam men ártúrli boıaýlar, partııanyń aty jazylǵan jalaýshalar men úlbirek matadan tigilgen jeńil qol sómkeler úlestirilip, syıǵa tar­tyldy. Al partııanyń saılaýaldy baǵ­darlamasyna sáıkes júrgizilgen bul is-sharanyń mazmunyn «Birlik» saıası partııasy Almaty fılıalynyń jetekshisi Dámen Bıdaıbekov bylaı túsindirdi: – О́zderińiz baıqaǵandaı, aýdıtorııada tolyp otyrǵan jasóspirimder daýys berý quqyna qol jetkizip úlgermegen býyn bolyp sanalady. Bul jerde eshqandaı saıası úgit-nasıhat jumysy joq. Biraq, «Birlik» saıası partııasynyń resmı tanylǵan «Izgi nıet! Adal qyzmet! Taza orta!» belgisiniń aıasynda sheberlik-sabaǵynyń ótýi jastardyń esinde uzaqqa saqtalary anyq. Onyń ústine sabaqty osy kolledjdiń burynǵy túlegi, «Birlik» partııasynyń búgingi belsendi múshesi Krıstına Depýtatova júrgizedi. Jas urpaq elimizdiń erteńi, sondyqtan da «Birlik» elimizdiń erteńin búgingi ýaqytpen sabaqtastyrýdy maqul dep tapty, – dedi ol. Shákirtterdiń jas ta bolsa eleýli je­tis­tikterge qol jetkizip, dúnıeniń ár bu­ryshyn aralaǵan, tipti, óz týyndy­laryn aýksıondarda baǵalatyp, satyp úl­gergen Krıstına Depýtatovaǵa qoıar su­raqtary da kóp boldy. Partııa múshesi de izbasarlarynyń árbir saýalyn zeıin qoıa tyńdap, zor yqylaspen jaýap qaıtardy. Jastardyń jadynda búgingi syıǵa tartylǵan boıaýlar men qylqalam, par­tııalyq belgi salynǵan jalaýshalar men sándi qol sómkeler saqtalary sózsiz. О́ıt­keni, búgingi sheberlik-sabaǵy shyn máninde de naǵyz sheberdiń qatysýymen óte qyzyqty ótti. Stýdentter ózderi dá­ris alyp júrgen oqý ornynyń túleginiń táji­rıbe dáristerin erekshe uıyp tyń­dady. Al kolledjdiń saılaý quqyne ıe shákirtterimen tús aýa ótken kezdesýi barysynda «Birlik» partııasynyń ókilderi óz baǵdarlamasynyń negizgi baǵyttary týraly ashyla aıtyp berdi. «Táýelsiz Qazaqstannyń bolashaǵy bizdiń qolymyzda!» degen partııalyqtar ýaqyt talabynan týǵan bastamalary men usynystaryn ortaǵa jaıyp sal­dy. Ekologııa salasy men rýhanı bilim berý, densaýlyq saqtaý men ekono­mıkalyq-áleýmettik salada ýaqyt kóshi­nen qalmaı tabysqa jetý – árbir azamat­tyń patrıottyq boryshy ekeni qyzý áńgimeniń negizgi taqyrybyna aınaldy. Talǵat SÚIINBAI, «Egemen Qazaqstan». ALMATY. Sýretti túsirgen Nıkolaı SÝDAKOV.