Aýyldyqtar eńbek ujymynda

Keshe «Aýyl» halyqtyq-demokratııalyq patrıottyq partııasy respýblıkalyq qoǵamdyq shtabynyń músheleri «Aleksandrov» kásipornynyń eńbekkerlerimen júzdesti. Etti óńdep, odan shujyq pen ózge de et ónimderin daıyndaıtyn óndiristik sehta uıymdastyrylǵan bul sharada «Aýyl» partııasynyń músheleri ká­sip­oryn qyzmetkerlerin «Aýyl dás­túrin jańǵyrtamyz» atty saılaýaldy baǵdarlamasymen tanystyryp, ondaǵy negizgi basymdyqtarǵa nazar aýdardy. Birinshi kezekte sóz alǵan partııa tór­aǵasy Álı Bektaev aýyl sharýashylyǵy salasyna qatysty máselelerge kóbi­rek toqtala kelip, «Elimizdiń agro­óner­kásiptik keshenin damytý, sonyń ishinde kásipkerlerdi qoldap, aýyl-aımaqtardaǵy taýar óndirýshilerge kási­bin kedergisiz júrgizýge jaǵdaı jasaý basty mindetterimizdiń biri», – dedi. Son­daı-aq, ol sońǵy jyldary aýyl men aýylsharýashylyq salasyn qoldaýǵa memleket tarapynan naqty qadamdar jasalyp otyrǵanyn aıta kelip, bul baǵytta sheshimin kútken túıtkilder de barshylyq ekenin jetkizdi. Sonymen qatar, Á.Bektaev par­tııa­nyń otandyq agroónerkásip keshe­nin damytýǵa baǵyttalǵan negizgi mindet­terdi jaqyn keleshekte júzege asyrý maq­satynda eńbektenetinin málim etti. «Bizdiń partııamyzdyń belsendileri iri sharýa qojalyqtaryn, úlken kásip­oryndardy aralap qana qoımaı, shaǵyn kásipkerlerdiń de muń-muqtajyn tyń­dap, olardyń qajettilikterin óteýge tyry­sady. Biz óndiris oryndaryn úlken, kishi dep bólmeımiz. Olardyń barly­ǵyna birdeı qaraımyz. Bizdiń negizgi maq­satymyz – aýylsharýashylyq salasyn damytý jáne osy baǵytta kóbirek jumys oryndaryn ashý. Biz úshin atalǵan salaǵa kómek kórsetý mańyzdy», – dedi partııa tóraǵasy. Al kásiporyn qyzmetkerleri men jumysshylary da kezdesý barysynda óz oılaryn jetkizdi. Olardyń aıtý­yn­sha, kásiporyn negizgi shıkizatty tek qazaqstandyq óndirýshiden alyp oty­rady. Sebebi, otandyq ónimniń dámi tutynýshyǵa jaqynyraq ári arza­ny­raq. Sondyqtan, kásiporyn et jetki­zetin jergilikti kásipkerlerdiń turaqty qyzmetine múddeli bolyp otyr. Jıyn barysynda seh qyzmetkerleri men jumysshylary saılaý naýqanynyń elimiz úshin mańyzdylyǵyn jete túsinetinderin jetkize kelip, aýyl sharýa­shylyǵy qazaqstandyq ekonomıkanyń qozǵaýshy kúshi bolýy tıis ekenin, sondyqtan «Aýyl» partııasynyń saıası naýqannan tys qalmaǵanyn oryndy dep esepteıtinderin aıtty. Máselen, seh jumysshysy Hamıt Shaldanbaev «Aýyl» partııasynyń baǵdarlamasyna kóńili tolatynyn, onda óte oryndy máseleler qamtylǵanyn jetkizdi. Kezdesý sońynda partııa belsendileri 50 adamdy jumyspen qamtyp otyrǵan kásiporynnyń jumysyna sáttilik tiledi. Joldybaı BAZAR, «Egemen Qazaqstan».