Márege jetti

Qazaqstan Respýblıkasy Táýelsizdiginiń 25 jyldyǵyna oraı elimizdiń barlyq óńirin aralap, izgi maqsatta sapar shekken «Máńgilik El» áleýmettik poıyzy óziniń mejeli jeri – Almaty shaharyna atbasyn tirep, sapar boıy atqarǵan ıgi mıssııasy týraly esep berdi. «Máńgilik El» poıyzyn qala ákimdigi men qalada ornalasqan túrli ult etnomádenı birlestikteriniń ókilderi, óner adamdary men jýrnalıster qaýymy saltanatty túrde qarsy aldy. El men eldi, jer men jerdi jaqyndastyrǵan izgilik saparshylary el Táýelsizdiginiń mereıli merekesin joǵary dárejede atap ótýge uıytqy bolǵan mıssııa atynan IýNESKO tiziminde arnaıy atap óti­letin Almaty qalasynyń 1000 jyl­dyq mereıtoıymen quttyqtap ótti. 15 aqpan men 18 naýryz aralyǵynda temirjol torabymen 11 myń shaqyrym joldy júrip ótip, 33 kúnde 33 eldi meken halqymen qaýyshqan, ár kezdesýinde túrli máselelerdi saraptap, el-jurttyń ózekti problemalarynyń oń sheshim tabýyna óz úlesterin qosqan saparshy top bul kúndi de josparǵa saı mańyzdy kezdesýler men paıdaly paıymdaýlarǵa arnady. Almatydaǵy Dostyq úıinde qala jurtshylyǵymen kezdesken mıssııa ókilderi ózderiniń atqarǵan jumysynan esep berip, sapar barysynda jınaqtaǵan málimetterin ortaǵa saldy. Bul toptyń sońǵy jumys kestesin tııanaqtaý úshin Almaty qalasynan «Astana Opera» Memlekettik mýzeı-teatrynyń jetekshisi, Qazaqstan Halqy Assambleıasynyń múshesi Aprıza Hýsaınova, Qazaqstan Prezıdenti janyndaǵy Respýblıkalyq memlekettik «Qoǵamdyq kelisim» birlestiginiń sarapshysy Ábdimomyn Asılov, QHA músheleri Lıýdmıla Hochıeva menLıýbov Nı sekildi birqatar azamattar qosyldy. Qaladaǵy Halyqqa qyzmet kórsetý ortalyǵynda «Máńgilik El» áleýmettik poıyzynyń jumys toby atalmysh mekemeniń jumys isteý tártibimen tanysyp, el azamattaryn kóbirek mazalaıtyn quqyqtyq, jekemenshik máselelerge qatysty kóptegen saýaldarǵa jaýap berdi. Sondaı-aq, qalalyq №29 emhanada da osy poıyzdyń atqarǵan mıssııasyna oraı halyqqa sapaly qyzmet kórsetý maqsatynda «Ashyq esik» kúni jarııalanyp, bilikti dárigerler qala turǵyndaryna qyzmet kórsetti. – Biz 33 kúnde 33 eldi mekende aıaldap, tańnyń atysy, kúnniń batysyna qaramastan, tipti, mereke kúnderi de halyqty qabyldadyq. Kóptegen máseleler qaraldy, pysyqtaldy. Elimizdiń barlyq mınıstrligi men vedomstvolarynan 300-den asa sarapshy-maman osy poıyzda bizben birge bolyp, halyqty qabyldady. Eldiń jaı-kúıimen etene tanysty. Biraz másele oń sheshimin tapty. Sapar barysynda 55 myń adamdy qabyldasaq, sonyń 13 myńnan astamy medısınalyq suraqpen habarlasqan eken. Bul poıyz eldigimizdiń eleýli merekesin joǵary dárejede atap ótýden ózge, halyqtyń izgi arman-maqsattarynyń sózsiz oryndalatynyna kepil bolǵandaı úlken áser etti, – dedi «Máńgilik El» poıyz shtaby jumysshy tobynyń jetekshisi Ámirjan Álpeıisov. «Máńgilik El» áleýmettik poıyzynyń jumysshy toby Almatyda mektep bitirýshi órendermen, tehnıkalyq jáne kásibı bilim berý mekemesiniń oqýshylarymen kezdesip, «Máńgilik El jastary – ındýstrııaǵa!» atty áleýmettik joba aıasynda qyzyqty kezdesýler men semınar-trenıngter ótkizdi. Mıssııanyń sońǵy jumys kúni tilshiler qaýymymen kezdesý men Qazaqstan Respýblıkasy Táýelsizdigine 25 jyl tolýyna oraı óner qaıratkerleriniń uıymdastyrǵan merekelik konsertin tamashalaýmen aıaqtaldy. Qanat ESKENDIR, «Egemen Qazaqstan». ALMATY. Sýretti túsirgen Maqsut ERJANOV.