«Qaırattyń» «Oqjetpeske» shamasy jetpedi

ASTANA. 19 naýryz. Búgin fýtboldan Qazaqstan premer-lıgasynyń 2-týry sheńberinde úsh oıyn oınaldy. Bul týraly egemen.kz tilshisi habarlady. Negizi chempıonat kestesine saı búgin tórt match ótýi tıis edi. Alaıda, «Atyraý» men «Tobyldyń» kezdesýi keıinge qaldyryldy. Oǵan qostanaılyq komandanyń Atyraýǵa barýǵa múmkindiginiń bolmaýy sebep bolyp otyr. Al oıyndarǵa keler bolsaq, Almatynyń «Qaıraty» Kókshetaýda jergilikti «Oqjetpespen» oınap, upaı bólisti. Mamandardyń kópshiligi «Qaırattyń» jeńiske jetý múmkindigi joǵary ekenin aıtyp, almatylyqtardyń úsh upaı oljalaıtynyn aıtqan edi. Degenmen, birinshi týrda teń oınaǵan «Qaırat» taǵy da bir upaımen shekteldi. Búgingi oıyndardyń nátıjeleri tómendegideı: «Aqjaıyq» (Oral) – «Ertis» (Pavlodar) 0:3 Goldar: Eldos Ahmetov 27, Ýsman Djalloý 45, Roman Murtazaev 55. «Oqjetpes» (Kókshetaý) – «Qaırat» (Almaty) 1:1 Goldar: Álibek Bóleshev 49 – Jerar Goý 44. «Taraz» (Taraz) – «Aqtóbe» (Aqtóbe) 1:1 Goldar: Igor Zenkovıch 45 – Samat Smaqov 11 (penaltı). Aıta keteıik, erteń 2-týr barysynda qalǵan eki oıyn oınalady. Atap aıtqanda, Shymkenttiń «Ordabasy» komandasy óz alańynda «Astanany» qabyldasa, Temirtaýda Qaraǵandynyń «Shahtery» Taldyqorǵannyń «Jetisýymen» kezdesedi. Elaman Qońyr. Derek: egemen.kz. Sýret: vk.com.