Mońǵolııanyń Baıan-О́lgeı aımaǵynda erteden turyp jatqan qazaqtar qaýymy kóp jyldardan beri Shyǵys halyqtarynyń jyl basy – Naýryz merekesin toılap turýdy baıaǵydan berik dástúrge aınaldyrǵan. Bul úrdis, ásirese, olardyń tarıhı otandary – Qazaqstan jerinde kóktem meıramynyń memlekettik deńgeıde atalyp óte bastaǵan shaǵynan bastap, munda da keń etek aldy.
Mońǵolııa qazaqtary qansha jyldardan beri bul merekeni jergilikti mońǵoldarmen birlese toılap keledi. Qazaqtar bul kúndi: «Ulystyń uly kúni», dep áspettese, mońǵoldar: «Ard túmnıı agýý ódór», dep qurmet tutady.
Burnaǵy kúni qandastarymyzdyń Naýryz merekesin toılaýynyń eń sharyqtaý shegi eldiń astanasy – Ýlan-Bator qalasyndaǵy Shyńǵys han alańynda kerýen jaıdy. Munda jaǵalaı tigilgen kıiz úılerdiń bárinde mol dastarqan jaıylyp, qazaqtyń ulttyq taǵamdarynyń barlyq derlik túrleri tórden oryn aldy. Al mýzyka oınap turǵan alańda qazaqtyń ulttyq kıim kıgen ul-qyzdary aınalanyń sánin keltirip júrdi. Munda bı bılenip, án salyndy, alýan túrli sporttyq saıystar kórik qyzdyrdy. Álbette, kelgenderdiń bári 7 túrli dámnen jasalǵan naýryz kójeden dám tatyp kórdi.
Mońǵolııa prezıdenti Elbegdorjdyń aıtqanyndaı, bul kúni: «Naýryz mońǵol halqynyń da qymbat qazynasy bolyp tabylatyn merekege aınaldy».
Murat AITQOJA.
