Sańlaqtar samǵaýy

Kongress-hollda Qazaqstannyń eńbek sińirgen ártisi Ramazan Stamǵazıev pen belgili estrada ánshisi Ultý Qabaevanyń «Aıttym sálem, saǵynyp» atty konserti ótti. Nesin aıtasyz, salqar Astana aspanyn sıqyrly saz kernegen kesh boldy bul. О́nerdiń egiz órimindeı juldyzdy juptyń jurtshylyqqa usynǵan baǵdarlamasy ózindik erekshelikterimen órnekteldi. Alqalaǵan áleýmettiń qoshemet-qolpashymen arqalanǵan qos sańlaq sahnada kezek samǵap, kórermen kóńilin kókke órletti. Qasıetti Hantáńiriniń baý­raıynda kindik qany tamǵan týma talanttyń áý basta Jetisý jeldirmelerimen aýyzdanǵany, árıne, zańdylyq. Bala jasynan Súıinbaı, Jambyl, Kenen, Kódek jyrlarymen sýsyndaǵany taǵy talassyz. Keıin eseıe kele Altaıdan Atyraýǵa deıingi aralyqtaǵy ulty­myz ulyqtaǵan ulylardy ózine úlgi-ónege tutyp, tanyn, talǵam órisin keńeıtti. Qazir Qazaq­stannyń qaı jerine barsa da sol ólkeniń arǵy-bergidegi dúldúlderi men bulbuldarynyń burynǵy-sońǵy ánderin «attyly túsip, jaıaý jatyp» tyńdaǵandaı deńgeıge jetkizip, úlken qurmetke bólenip júrgeni, sirá, sondyqtan shyǵar. Ataqty dırıjer Aıtqalı Jaıymov jetekshilik etetin elorda fılarmonııasynyń ult aspaptar orkestriniń súıemeldeýimen án áýeletken Ramazannyń «qulaqtan kirip, boıdy alar» qońyr daýysy birde qalyqtap, birde sharyqtap tyńdarmannyń tolqymaly-shalqymaly sezim pernelerin tereńnen terbep jiberdi. Kezinde Jánibek Kármenov, Qaırat Baıbosynov sekildi tu­ǵy­ry bıik tulǵalardan tálim-tárbıe alǵan ol, ásirese, atadan mıras asyl muralarymyz – ha­lyq ánderin oryndaǵanda, alty Alashtyń ardaǵyna aınalǵan Aqan, Birjan, Jaıaý Musa, Mu­hıt, Ǵazız, Áset jáne basqa aq­­pa-tók­pe aqyndarymyz ben sal-serilerimizdiń saf altyndaı shyǵarmalaryn shyrqaǵanda er­kińnen tys elire degbiriń ketip, delebeń qozyp «áp, bárekeldi!» demeske áddińiz qalmasyna biz kepil. Al endi «Aǵash aıaqty» ańy­ratqanda pań Parıjdi «paı-paılatqan» áıgili Ámire úrdisiniń áli úzilmegenine únsiz shúkirshilik etesiz. Balýan Sholaqtyń «Ǵalııa­syn» baıaýlata bastap, bara-bara bastyrmalata jónelgende zaldaǵy jigit-jeleńniń boıyn jelik býyp, baıypty aǵalardyń baıaǵy «el qydyrǵan eser shaǵy» eriksiz esterine túskeni anyq. Arqanyń aqtańgerin súısindirgen sulý ómirde bolǵan adam. Aqmolada talaıdy tamsandyrǵan qymyzshy qyz. Biraz basylymdarda sýreti jarııalanǵany bar. Súıegi Astana qalasyndaǵy «Jas­tar» shaǵyn aýdanynda ornalasqan musylmandar zıratynda jerlengen. «Ánshi joq Qaraótkelde menen asqan» dep asqaqtaǵan Ǵazı­zińiz de osy óńirdiń týmasy. Ra­ma­zan repertýaryndaǵy onyń bul ánin jastaılarynan jattap ósken baıyrǵy aqmolalyqtar basqalardan góri jylyraq qabyl­daǵany tolassyz. Dara daryn ıesi kópshilik asyǵa kútken «Darıǵa – dáý­ren­ge» kezek tıgende qııaǵa qa­nat qaqqan qyrandaı qulashyn keńge sermedi. «On eki vzvod daý­ysyn» erkin ji­berip, eldi silt­ideı tyndyrdy. Árkim óz oıymen áýre. Bári bir sát ómir­diń ótkin­shi ekendigindeı, dúr­­mekke  to­ly  dúnıeniń jalǵand­y­­ǵyn uq­qandaı... Memlekettik syılyqtyń laýreaty Nesipbek Aıtovtyń sózine jazylǵan Tursynjan Shapaıdyń osynaý orny bólek ánin áldebir sebeptermen tyńdamaı ketsek, qulaq quryshymyzdyń qanbaı qalary sózsiz edi. Konserttik keshte R.Stam­ǵa­zıev, sondaı-aq, buryn aty-jónderi kóp estile qoımaǵan bir­neshe kompozıtorlardyń tyń týyn­dylaryn oryndady. Solar­dyń ishinde Erbol Spanalıev pen Aıt­murat Tóreǵalı syndy óre­­li órenderimizdi bóle-jara aıtqanymyz jón. Olardyń oryndaýynda Mu­qaǵalı Maqataevtyń jáne Nur­­lan Orazalınniń mándi mátinde­rimen kestelengen kelisti ánderdiń tusaýy kesildi. Qurmanǵazy atyndaǵy Ulttyq konservatorııada ustazdyq etetin Ramazan Stamǵazıev búginde talaptyń taıyp mingen keıingi tol­qyn ókilderin tár­bıeleýmen de aınalysady. Sol shákirtteriniń biri О́zgeris Serikbaı astanalyqtardyń aldyna shyǵyp, Jarylǵapberdiniń «Shanasyn» quıqyljytty. Sóı­tip, ónersúıer qaýymǵa óziniń qa­bilet-qarymy óte moldyǵyn moıyn­datty. Abyroıly azamattyń ómirdegi hám ónerdegi senimdi serigi Ultý Qabaeva da elordalyqtar al­dyn­da esh aıanyp qalǵan joq. Jaq­­synyń tańdap alǵan jaryna laıyq minez tanytty. Syń­ǵyrlaǵan únimen syzyltqan Shá­bá Ádenqulqyzynyń «Qazdar qaı­typ barady», Ermek Elge­zektiń «Kóktem – sezim», Tur­syn­jan Shapaıdyń «Men saǵynyp kelgende», Baqyt Eleýsiz­ulynyń «Dos­tarym» ánderi dittegen je­rine jetip jatty. Ulystyń uly kúni – Naýryz meıra­mymen tuspa-tus kelgen atalmysh konsertte qazaqtyń dástúrli mýzykalyq muralary men zamanaýı yrǵaqtar ózara úılesim taýyp, jańasha sıpatpen talǵampaz kórermenge jol tartty. Talǵat BATYRHAN, «Egemen Qazaqstan».