Qurama maýsymdy jeńispen bastady

Fýtboldan Qazaqstan quramasy 26 naýryz kúni Ázerbaıjanmen joldastyq kezdesý ótkizip, 1:0 esebimen jeńiske jetti. Ulttyq quramanyń bıylǵy birinshi resmı oıyny bolǵan bul match Túrkııanyń Antalıa qalasynda ótti. Oıyndy bizdiń jigitter óte shıraq bastady. Birden dopqa ıelik etip, alǵa umtylǵan qazaq­standyqtar bar bolǵany 8-mınýtta esep ashyp úlgerdi. Atap aıtqanda, Serik­jan Mujyqov pen Baýyrjan Islam­hannyń uıym­dastyrǵan shabýylyna Maqsat Baıjanov nátıjeli núkte qoıyp, goldyń avtory atandy. Goldan qanattanǵan jerles­terimiz budan keıin de birneshe shabýyl uıymdastyrdy. Alaıda, olar sheshýshi sátterde múlt ketip, esepti eseleý múmkindigin paıdalana almady. Ázerbaıjan oıynshylarynyń tarazy basyn teńestirý úshin jasa­ǵan áreketteri de eshqandaı nátıje ákelmedi. Ekinshi taımdy qos komanda da óte belsendi bastady. Tipti, 56-mınýtta Sergeı Hıjnıchenkoda esepti eseleıtin tamasha múmkindik te boldy. Biraq onyń qaqpaǵa baǵyt­t­aǵan doby nysanadan qıys ketti. Artynsha Maqsat Baı­ja­nov dýbl ataný múmkindigin múlt jiberdi. Onyń jolyna Ázerbaıjan qaqpashysy Kıamran Agaev tosqaýyl boldy. Oıyn sońyna deıin qar­sylastar alma-kezek shabýyl­daǵa­nymen, gol soǵylmady. Jat­tyqtyrýshylardyń tyńnan qosqan oıynshylary da oıyn órnegin aıtarlyqtaı ózgerte almady. Nátıjesinde Qazaqstan quramasy jeńiske jetip, fýtbolshylarymyz otandyq jankúıerlerdi bir qýantty. Aıta keteıik, ótken jyldyń jeltoqsan aıynda Iýrıı Krasno­jan qyzmetinen ketkeli beri fýtboldan ulttyq quramamyzdyń bas jattyqtyrýshysy áli ta­ǵaıyn­dalǵan joq. Sol sebepti, atal­ǵan oıynǵa bas komandamyzdy ult­tyq quramanyń aǵa jattyq­tyrýshysy Nurken Mazbaev pen «Aqjaıyq» komandasynyń bas jattyqtyrýshysy Talǵat Baısýfınov bastap shyqty. Son­­daı-aq, jattyqtyrýshylar quramynda Andreı Ferapontov pen Iýrıı Novıkov bar. Bul mamandardyń jetekshiligimen Qa­zaqstan taǵy bir joldastyq kez­desý ótkizedi. Atap aıtqanda, búgin Tbılısıde fýtbolshylarymyz Grýzııa quramasymen synǵa túsedi. Elaman QOŃYR, «Egemen Qazaqstan».