Mıdy basqaratyn qurylǵy

– mektep oqýshysynyń ınnovasııalyq jobasy Kókshetaýda mektep oqýshysy Aleksandr Danılov mı ımpýlsyn basqaratyn qurylǵy oılap tapty. Avtorlyq jumysynyń arqasynda ol halyqaralyq konkýrsta ekinshi oryndy ıelendi. Bul qurylǵyǵa mamandar erekshe qyzyǵýshylyq tanytyp otyr. Al elimizdiń birqatar joǵary oqý oryndary 11 synyp oqýshysyn grant negizinde oqýǵa qabyldaýǵa daıyn. Jańa qurylǵyny №19 fı­zıka-matematıkalyq mekteptiń oqýshysy óziniń ustazy Vıktor Gaıdarenkonyń kómegimen qurastyryp shyǵarǵan. Ol zertteý jumysymen besinshi synyptan beri aınalysyp keledi eken. – Adam bilegine jalǵanǵan sym arqyly biz bıoımpýlsty alamyz. Alaqanymdy qysqan kezde bıotok transformatorǵa túsip, myń ese kúsheıedi. Osydan soń atqarýshy mehanızmdi iske qosatyn syzbanusqaǵa ornalasady. Halyqaralyq konkýrsta ekinshi oryn alǵanym úshin maǵan UBT-nyń 125 baldyq sertıfıkatyn tapsyrdy, – deıdi Aleksandr Danılov. Bul mektepte daryndy balalar jetkilikti. Aleksandr sııaqty talantty mektep oqýshylarynyń biri – Baqtııar Qabashev. Ol jaramsyz bolyp qalǵan lıýmınıssenttik shamdardy ekinshi márte qol­danýdyń joldaryn oılap tapty. – Jurt kúıip ketken shamdardy qoqysqa tastaýdy jón kóredi. Al olardyń quramynda adam densaýlyǵyna keri áserin tıgizetin synap bar. Osyǵan baılanysty men lıýmınıssenttik shamdardy qaıtadan paıdalanýdyń joldaryn qarastyrdym. Aldaǵy ýaqytta bul eki kondensator alty dıod jáne bir rezıstordyń kómegimen jumys isteıtin bolady, – dedi Baqtııar Qabashev. Aıta keteıik, ǵalymdar Alek­sandr Danılovtyń jobasyn óner­kásipte, medısınada, avıasııa­da jáne turmystyq jaǵdaılarda qoldanýǵa bolady dep sanaıdy. Al Baqtııar Qabashevtyń jumysy lıýmınıssentti shamdardyń qaýip­tiliginen saqtaıdy. Baqbergen AMALBEK, «Egemen Qazaqstan». KО́KShETAÝ.