ASTANA. 2 sáýir. Memleket basshysy Iаdrolyq qaýipsizdik jónindegi sammıt aıasynda Japonııa premer-mınıstri Sındzo Abemen kezdesti. Bul týraly akorda.kz habarlady.
Kezdesý barysynda taraptar ekijaqty yntymaqtastyqtyń, sonyń ishinde saýda-ekonomıkalyq, saıası jáne mádenı-gýmanıtarlyq salalardaǵy ózara is-qımyldyń negizgi baǵyttaryn talqylady.
Nursultan Nazarbaev Sındzo Abeniń Astanaǵa taıaýdaǵy sapary Qazaqstan men Japonııa qarym-qatynasyn jańa sapaly deńgeıge kótergenin, qol jetken ýaǵdalastyqtardy júzege asyrý turǵysynan eki el úkimetteriniń búginde belsene jumys istep jatqany sonyń aıǵaǵy ekenin atap ótti.
Memleket basshysy búgingi sammıttiń taqyryby ıadrolyq qarý synaǵynan zardap shekken eki el halqyna da jaqyn ekenine, sol sebepti Qazaqstan men Japonııanyń jahandyq antııadrolyq qozǵalystaǵy ustanymdarynyń da uqsas ekenine nazar aýdardy.
Nursultan Nazarbaev pen Qazaqstan halqyn Japonııa premer-mınıstri aldaǵy Táýelsizdiktiń 25 jyldyǵymen jáne Parlament Májilisi saılaýynyń tabysty ótýimen quttyqtady.
Sındzo Abe Qazaqstan-Japonııa baılanystarynyń belsendiligi artyp kele jatqanyna da rızashylyq bildirdi.
Aıan Ábdýálı.
Derek, foto: akorda.kz.
