Ońtústikte mektep oqýshysy 3 jastaǵy qyzdy ajaldan qutqardy

ASTANA. 4 sáýir. Ońtústik Qazaqstan oblysy Qazyǵurt aýdanynyń Qosaǵash aýylynda Muhammedáli Quraq esimdi 4 synyptyń oqýshysy 3 jastaǵy qyzdy ajaldan qutqaryp aldy. Bul týraly egemen.kz tilshisi habarlady. Jurtshylyqqa batyr balanyń erligi týraly habardy Altyntóbe aýylynyń turǵyny Seıdaly Dúısebaıuly jetkizdi. Ol facebook áleýmettik jelisindegi paraqshasynda oqıǵanyń qatty nóserden keıin  bolǵanyn aıtty. «Túnimen tókken jaýyn aýyl ishin seldete óte shyqqan. Sol tasqynda Qosaǵash aýylynda 3 jasar qyzdy sý aǵyzyp biraz jerge barǵanda myna bir qarshadaı bala qutqaryp alypty. Qutqaryp alǵasyn essiz jatqan kishkentaı búldirshinniń kókiregin basyp, jutqan laı sýyn qusqyzypty. Laı sýmen birge shóp-shalam, aǵash butalary tústi deıdi kórgender. Aýyl turǵyndary qarshadaı balanyń erligin ańyz qyp aıtyp júr. Balanyń aty Muhamedáli. 4 synypta oqıdy», dedi ol. Biz osyny estı sala balanyń ózimen nemese ákesimen habarlasýǵa asyqtyq. Alaıda Qosaǵash aýylynda uıaly baılanys nashar bolǵannan keıin ázirshe Seıdaly Dúısebaıulynyń habarymen shektelýdi jón kórdik. Dastan Kenjalın. Derek, foto: Seıdaly Dúısebaıulynyń facebook áleýmettik jelisindegi paraqshasy.