ASTANA. 4 sáýir. Aqtóbede qoǵamdyq kómekshiler ınstıtýty engizildi. Bul týraly egemen.kz tilshisi habarlady.
Oblys ákiminiń qoǵamdyq kómekshileri ınstıtýty óńir basshysy Berdibek Saparbaevtyń bastamasymen engizilip otyr. Qoǵamdyq kómekshilerdiń basty maqsaty oblys basshysy men turǵyndar arasyndaǵy baılanysty kúsheıtý, turǵyndardy mazalaıtyn máseleler men aýyl-aımaqtardaǵy jaǵdaılar jóninde oblys basshysyn aqparattandyrý bolyp tabylady. Oblys ákiminiń kómekshileri, sonymen birge, turǵyndardy qabyldap, kezdesý barysynda kelip túsken aqparattardy oblys ákimdigine jetkizip otyrady.
«Biz aýdan ákimderi usynǵan málimetterge senemiz, alaıda olar ózderine tıimdi málimetterdi beredi. Al sizderdiń jumystaryńyz, oblys basshysyn shynaıy jaǵdaımen habardar etip otyrý. Ásirese, bilim berý, medısınalyq qyzmet kórsetý, negizgi azyq-túlik túrlerine baǵa, aýyl sharýashylyǵyn damýy týraly áleýmettik salaǵa nazar aýdarýlaryńyzdy suraımyn», dep atap ótti Berdibek Saparbaev.
Aımaq basshysynyń kómekshileri qatarynda Aqtóbe oblysynyń 12 aýdanynyń bedeldi ókilderi bar, olar aımaqtyń áleýmettik-ekonomıkalyq damýyna úles qosqan, qoǵam ómirine belsendi aralasyp júrgen jandar.
Berdibek Saparbaev óziniń qoǵamdyq kómekshilerimen kezdesip, olarǵa kýálikterin tabys etti.
Aıta keterlik jáıt, qoǵamdyq kómekshilerdiń jumys isteýine yńǵaıly bolýy úshin bólme men telefon, sonymen birge aýdandaǵy eldi mekenderge qatynaýyna kólik beriletin bolady.
Satybaldy Sáýirbaı.
Derek, foto: egemen.kz
