Kókshetaýda aýksıonnan 3 mln. teńgege jýyq aqsha jınaldy

AQMOLA. Kókshetaýdaǵy Dostyq úıinde Qazaqstan halqy Assambleıasynyń janyndaǵy Analar keńesi oblystyq ákimdiktiń qoldaýymen el táýelsizdiginiń 25 jyldyǵyna jáne «Qaıyrymdylyq kerýeni» respýblıkalyq aksııasy sheńberinde aýksıon ótkizdi. Bul týraly egemen.kz tilshisi habarlaıdy. Naýqas balalar men olardyń otbasylaryna kómek kórsetýge baǵyttalǵan bul sharaǵa oblystyq basqarmalardyń basshylary, kásiporyndardyń jetekshileri, memlekettik qyzmetkerler men kásipkerler qatysty. Qaıyrymdylyq aksııasynyń ashylý rásiminde Aqmola oblysy ákiminiń orynbasary Nurlan Nurkenov kómekke muqtaj jandarǵa qol ushyn sozýǵa nıet bildirgen azamattarǵa alǵysyn bildirdi. «Oblysymyzda múmkindigi shekteýli, ómirge qushtar jandar az emes. Olar qaıyrymdy azamattardyń kómegine muqtaj. Sondaı jandarǵa qol ushyn berý qalypty nársege aınalýy kerek dep esepteımin. Sonda bizder ózgelerge úlgi bolyp, meıirimdiliktiń dástúrli túrde jalǵasýyna uıtqy bolamyz. Naýqas balalarǵa jasaǵan jaqsylyǵymyzdy búkil adamzatqa tıgizgen sharapatymyz dep uǵynǵan jón», – dedi Nurlan Nurkenov. Budan keıin alty kezeń boıynsha 30 lot oınatyldy. Munda ónerpaz daryndy balalarmen jumys júrgizý jónindegi oblystyq oqý-ádistemelik ortalyǵy men «Áýlet» mektepten tys jumys ortalyǵy oqýshylarynyń qolóner buıymdary satylymǵa tústi. Sondaı-aq, Qazaqstan halqy Assambleıasynyń Aqmola oblystyq fılıaly halyqtyq sándik-qoldanbaly shyǵarmashylyq sheberleriniń týyndylary qoıylǵan arnaıy satylym kórmesi usynyldy. Satýdan túsken qarjy Aıdarbek Qaparov pen Mansur Qusaıynov esimdi eki naýqas balany emdeýge jumsalmaq. Aýksıon qorytyndysynda arnaıy komıssııa aqshalaı jáne shotqa aýdarý arqyly 2 mıllıon 800 myń teńgeden astam qarjy jınalǵanyn málimdedi. Bul aqshany Analar keńesiniń tóraıymy Zere Qıyqova atalǵan balalardyń analary Nurgúl Qusaıynova men Sardal Omarálıevaǵa tabys etti. О́z kezeginde ata-analar qol ushyn sozǵan qaıyrymdy jandarǵa rızashylyǵyn bildirip, alǵysyn aıtty. Baqbergen Amalbek. Derek, sýret: egemen.kz.