AQTО́BE. 4 sáýir. Oblys ortalyǵyndaǵy Qazaqstan halqy Assambleıasy ǵımaratynda Qazaqstan Respýblıkasy Táýelsizdiginiń 25 jyldyǵyna jáne oblystyq halyq shyǵarmashylyǵy úıiniń 55 jyldyǵyna arnalǵan Nursulý Tapalova atyndaǵy III respýblıkalyq «Bıdiń nury – Nursulý» atty jeke oryndaýshylar bı baıqaýy márege jetti. Bul týraly egemen.kz tilshisi habarlady.
Baıqaýdy uıymdastyrýdyń maqsaty – qazaqtyń balet bıshisi, Qazaq KSR-niń eńbek sińirgen ártisi Nursulý Tapalovanyń shyǵarmashylyǵyn nasıhattaý, horeografııa ónerin jáne halyqtyq bılerdiń jeke oryndaýshylaryn óskeleń urpaq pen shyǵarmashyl jastar arasynda keńinen nasıhattaý.
Oǵan jastary 15-25 aralyǵyndaǵy elimizdiń Astana, Atyraý, Shymkent, Qyzylorda, Atyraý, Semeı, Taraz, Aqtaý, Aqtóbe qalalary men Aqtóbe oblysynyń Oıyl aýdanynan 14 kásibı jáne áýesqoı bı ujymdarynyń jeke oryndaýshylary qatysty.
Eki týr boıy bı baıqaýyna qatysýshylardyń akterlik sheberligin, kórkemdik-sahnalyq beınesin, bı qozǵalysynyń máneri men ereksheligin saralaǵan qazylar alqasynyń sheshimimen astanalyq bıshi Ashat Máden baıqaýdyń Gran-Prı júldesin jeńip aldy. Birinshi oryndy da astanalyq Saǵynysh Nurhaıdarova ıelendi. Ekinshi oryn Ońtústik Qazaqstan oblysynyń bıshisi Marjan Sársenbekke buıyrdy. Úshinshi oryndy Mańǵystaý oblysynan kelgen bıshi Anar Qydyrbaeva men aqtóbelik Kámshat Bımaǵanbetova bólisti.
Baıqaý jeńimpazdary men júldegerleri dıplomdarmen jáne aqshalaı syılyqtarmen marapattaldy. Baıqaýǵa qatysqan bıshilerdiń barlyǵyna da bı óneri saıysyen uıymdastyrýshylar atynan syı-sııapat jasaldy.
Satybaldy Sáýirbaı.
Derek, foto: egemen.kz
