Bıznesti transformasııalaý – búgingi zaman talaby

«Qazaqstan temir joly» UK» AQ-ta bıznesti transformasııa­laý baǵdarlamasy jemisti júrgizilip jatyr. Bul jóninde ulttyq kompanııanyń keńeıtilgen jıynynda aıtyldy. Sharaǵa temirjolshylar men «Samuryq-Qazyna» UÁQ» AQ-tyń basqarma tóraǵasy О́mirzaq Shókeev jáne birqatar memlekettik organdardyń qyzmetkerleri qatysty. Ulttyq kompanııada bız­nes­ti trans­­formasııalaý baǵdar­lamasyna arnalǵan keńeıtilgen jıynda kompanııa prezıdenti Asqar Mamın Mem­leket basshysy salada atqarylýǵa tıis mindettemelerdi anyq belgilep ber­genin aıtty. «Ol tapsyrmalardyń eń mańyzdysy saladaǵy bıznesti zaman talabyna saı transformasııalaý bolatyn. Bul baǵytta «Samuryq-Qazyna» men qurylymnyń ózge de enshiles kompanııalarynda ótken jyldyń kókteminde bastalǵan bıznesti trans­formasııalaý jumysyn «Qazaq­stan temir joly» ulttyq kompanııasy da baǵdarlamaǵa saı naqty júrgizip keledi. Atqarylǵan jumystar az emes. Búgingi jıynda osynaý oryndalǵan istiń naqty nátıjelerin áńgimeleımiz», dedi. Baǵdarlamany iske asyrý barysynda ulttyq kompanııada ár sala ýa­qyt talabyna saı jetildirilip, álem­dik kompanııalarmen ıntegrasııalaný úderisi júrgizilgenin aıtyp ótti. Sondaı-aq, kompanııany basqarýdyń jańa júıeleri engizilgenine toqtaldy. Sóıtip, «QTJ» UK» AQ ózgeristerin uıym­dastyrý kompanııanyń na­ryq­taǵy ornyn aıqyndaý úshin tap­syrys berýshiler suranysyn qanaǵattandyrýǵa yńǵaılanýyn talap etetinin bildirdi. Keńeıtilgen otyrysta «Samuryq-Qazyna» UÁQ» AQ bas­qarma tóraǵasy О́.Shókeev álemdik naryqtaǵy jáne tehnologııalyq tú­begeıli ózgerister talapqa saı bolyp, ishki rezervterdi taý­yp, básekelestikte qolaıly, oń­taıly joldardy qarastyrý kerektigin atap ótti. «Álemdik jetekshi kompanııalardaǵy ishki aınalym azaıdy. Naryqta óte qatal básekelestik qalyptasty. Temirjol salasynda da solaı bolyp otyr», degen ol qordyń bıznesti transformasııalaý týraly bastamashylyǵy der ke­zinde bastalyp, bul iste QTJ-nyń óte aýqymdy jumystar atqar­ǵandyǵyn atap ótti. Oǵan qosa, trans­formasııa úderisi – bul teorııa emes, bul jumysty prak­tıkalyq istermen dáıekteı túsý ekenin qadap aıtty. Kompanııa jańa operasııalyq modelge kóshýdiń tıisti ázirlik qujattaryn daıyndady. 2015 jáne 2016 jyldary kompanııa strategııasy jasaqtaldy. Paıdaly áser koeffısıenti strategııasy bekitildi. PÁK butaǵynyń jaı-japsary men IT jańa arhıtektýrasy jasaldy. «Tranzıttik tasymaldaǵy ba­la­maly baǵdarlardaǵy bá­seke­lestiktiń joǵarylyǵy tapsyrys berýshilerdiń sura­ny­syn qanaǵattandyrý úshin na­ryqtaǵy úderisterdi jáne tehnologııalardy jańǵyrtyp, túbegeıli qurylymdyq ózgeristerdi qajet etedi. Osyǵan baılanysty, «QTJ» UK» AQ-ty transformasııalyq qurylymdaýdyń ýaqyty kelip otyr», dedi A.Mamın. Kompanııa basshysy temirjol salasyn memlekettik josparǵa baı­lanysty ınstıtýttyq túr­len­dirý men zańdylyq talapta­ryna sáı­kestendirip, qaıta qu­ry­lymdaý barysy jóninde de aıtty. «Samuryq-Qazyna» bekit­ken 2016 jylǵy jol kartasyna sáıkes, kompanııa óziniń negizgi qyzmetindegi ózgeristerdi engizýge kiristi. Búgingi tańda, jańa ope­­rasııalyq modelge ótý úshin tıis­ti daıyndyq qujattary ázirlendi. Trans­for­masııalaý aıasyndaǵy naqty iske kirisýdiń uıymdastyrý sharalaryn bastaý qajet. Sebebi, ǵalamdyq eko­nomıkadaǵy qurylymdyq óz­gerister men damý úderisi kom­panııa bıznesindegi ósim kózderin aıqyndaýǵa yqpal etedi. Kompa­nııa mýltımodaldyq jáne tran­zıttik tasymaldaǵy segmentin ıem­denip, sonymen qatar, tasymaldaý jumysyndaǵy sapalyq kórsetkish tıimdiligin kóterýde», dedi A.Mamın. Ulttyq kompanııa basshysy eli­mizdegi jáne álemdegi júk tasý úderis­terine toqtalyp, budan bylaı kún saıyn jańa qyzmetke, jańa talapqa saı jumys isteýge árýaqyt daıyn bolý kerektigin qadap aıtty. Nurbaı ELMURATOV, «Egemen Qazaqstan».