Mereı men marapat

Keshe Mádenıet jáne sport mınıstrliginde AQSh-ta ótken úsh halyqaralyq jarystan 14 medaldi qanjyǵaǵa baılap qaıtqan karateshilerge qurmet kórsetilip, olarǵa mınıstr atynan gramotalar men estelik syılyqtar tabys etildi. «Qazaqstannyń týyn bıikte jelbiretip, baıraqty básekeden oljaly oralǵan sportshylarymyzǵa alǵystan basqa aıtarymyz joq. Kim eńbektense, kim talpynsa sol bıik belesti baǵyndyrmaı qoımaıdy. Sizderdiń búgingi jeńisterińiz eren eńbektiń jemisi dep bilemin. Jas chempıondardy shaqyryp, osy­laı marapattaýymyzdyń maq­saty – olardyń Qazaqstan sportyna qosyp jatqan úlesin nası­hattaý jáne sportpen aınalysyp júrgen basqa balalarǵa osyndaı bıik jetistikterge jetýge bolatyndyǵyn kórsetý», – dedi Mádenıet jáne sport mı­nıstrliginiń jaýapty hatshysy Qýatjan Ýálıev. Aıta ketetin taǵy bir jaıt, AQSh-tyń Las-Vegas qalasynda karate-dodan ótken úsh halyqaralyq týrnır – Junior Championship, USA Open jáne Ozawa Cup jarysynan qazaqstandyq sportshylar enshilegen 14 medaldiń úsheýi altyn, altaýy kúmis jáne beseýi qola ekenin esterińizge salamyz. Jalpy, bul halyqaralyq dodaǵa álemniń 40-tan astam elinen kelgen jas sportshylar qatysqan bolatyn. «Amerıka Qurama Shtatynda ótken bul jarys men úshin ma­ńyzdy jarystardyń biri bolyp sanalady. Sebebi, bul saıysqa eń myqty sportshylar qatysyp, baqtaryn synaıdy. Meniń sal­maǵymda osaldar bolǵan joq. Biraq men ózimniń bapkerlerim­niń jattyqtyrýymen jáne de jan-jaqty daıyndyǵymnyń arqasynda qarsylastarymdy tize búktirip, tek sońǵy fınaldyq saıysta brazılııalyq sportshyǵa ese jiberip aldym. Osy jolǵy qatelikterimdi aldaǵy alamandarda qaıtalamaýǵa tyrysamyn», – dedi atalmysh jarysta ekinshi oryndy enshilegen Álisher Qabdýllaev. Raýan QAIDAR, «Egemen Qazaqstan».