Máshhúr Júsip murasy

Taıaýda Qazaqstan Respýblıkasy Tuńǵysh Prezıdentiniń Mýzeıinde «Máshhúr jaıly sóz etkende...» atty ataqty folklortaný­shy, aqyn Máshhúr Júsip Kópeıulynyń ta­rıhı-mádenı murasyn nasıhattaýǵa arnal­ǵan ádebı  kesh jáne kórmeniń ashylýy bolyp ótti.  Barshaǵa belgili, Máshhúr Júsip Kópeıuly (1858-1931jj.) Pavlodar oblysy, Baıanaýyl aýdanynda týǵan. Folklortanýshy, etnograf, ta­rıhshy, talantty aqyn, arab jáne parsy tilderin jetik meńgergen. Onyń ádebı jáne ǵylymı murasy qazynaly qazaq mádenıetiniń ajyramas bir bóligi bolyp tabylady. Atalǵan  is-shara el Táýelsizdiginiń 25 jyl­dy­ǵyn merekeleýge arnalǵan kórmeler kóshin bas­tap berdi. Jıynǵa fılologııa ǵylymdarynyń doktory, professor S. Negımov, tarıh ǵylym­darynyń kandıdaty, dosent  L.Júsipova, L.N. Gýmılev atyndaǵy EUÝ prorektory, fı­­lo­logııa ǵylymdarynyń doktory, professor D.Qamzabekuly, taǵy basqa zııaly qaýym ókil­derimen qosa, kesh qonaqtary retinde M.J.Kópeıulynyń shóbereleri jáne aqyn shyǵarmashylyǵyn zertteýshiler qatysty. Kórmede mýzeı qyzmetkerleriniń jınaq­taý jumystarynyń barysynda júıelengen Buhar jyraý atyndaǵy Pavlodar  oblystyq ádebıet jáne óner mýzeıi, Q. Sátbaev atyndaǵy memorıaldyq mýzeıi,  L.N. Gýmılev atyndaǵy Eýrazııa ulttyq ýnıversıteti jáne «Otyrar kitaphanasy» ǵy­lymı ortalyǵy qorlarynyń materıaldary usy­nyldy. Ádebı keshte M.J.Kópeı­ulynyń ádebıettanýshylyq oılary, aqynnyń poezııasy men zamandas orys klassıkteriniń týyndylary oqylyp,  tanystyryldy. Shara aıasynda Uly Dalanyń rýhanı mura­syn zertteýdegi ózekti máseleler qozǵalyp, mýzeı jáne kitaphanalar qorlarynda saqtalǵanymen, aınalymǵa tuńǵysh engizilip otyrǵan materıal­darǵa basa nazar aýdaryldy. Sondaı-aq, kórme ekspozısııasynda oıshyl aqynnyń jeke zattarynyń qatarynda qundy qoljazbalar, kitap basylymdary men eńbekteri, ádebıettaný materıaldary, kıgen kıimi men tu­tynǵan zattary usynyldy. Raýshan TÁÝIRHANQYZY, «Egemen Qazaqstan».