Bulaqtyń kózin ashatyn aýyl

Aqjar – Úrjarǵa kireberiste, aýdan ortalyǵymen jalǵasyp jatqan jasyl aýyl. Aýyldyq okrýgke Aqjardan bólek Amangeldi men Qaramoıyl eldi mekenderi enedi. Barqytbeldiń berekeli baýyryndaǵy shaǵyn aýyldyń ákimi Táýirjan Shomanovpen aýdan basshysy Serik Zaınýldın tanystyrǵan bolatyn. Buryn qarjy, salyq salasynda eńbek etken Táýirjan Qabaıuly qara sózge júırik, halyq kókeıindegi máseleni qozǵaı biletin qajyrly jas qyzmetshilerdiń biri eken. Eki kúndik saparymyzda etene áńgimelesip kettik. Josparymyzda joq bolsa da, sapar sońyndaǵy sál aıaldy paıdalanyp, jas ákim jetekshilik etetin aýyl tynysymen tanystyq. Úrjar – sportshylar kóp shyqqan óńir. Aqjardyń ortalyq kóshesi táýel­­siz Qazaqstannyń alǵashqy chem­pıondarynyń biri, belgili sportshy Nurbolat Jyńǵylbaevtyń esimimen atalady. Kóshe 2013 jyly tolyq jaryq­tandyrylypty. Sondaı-aq, turǵyndar men sport úıirmelerinen kesh qaıtatyn balalardyń qaýipsizdigi úshin basqa da birqatar kósheler men Bolat Turlyhanov atyndaǵy orta mekteptiń mańaıy samaladaı jarqyraıdy. Aq­jardyń damýyna aýdan ákiminiń qoldaý kórsetip otyrǵanyn jetkizgen T.Qabaıulynyń aıtýynsha, 18 myńnan astam halqy bar aqjarlyqtar negizinen egin jáne mal sharýashylyǵymen shuǵyldanady. 145 sharýa qojalyǵy, 16 myńǵa jýyq egistik alqaby bar. Sońǵy ýaqytta «QazAgroqarjy» AQ arqyly 6 jańa tehnıka satyp alyndy. Qazir oblys ákiminiń tapsyrmasy aıasynda sýarmaly alqaptardy kóbeıtý, jerdi qunarlandyrý úshin alqaptardy maıly daqyldardan dándi daqyldarǵa kóshirý jumystary júrgizilýde. Aýyl ortasynda 1,6 mln. teńge qarjyǵa balalardyń oıyn jáne sport alańy salynyp jatyr. Sondaı-aq, maqanshylyq kásipker Juman Qyńyrbekovtiń 45 adamdyq áleýmettik monshasy jumys isteıdi. Aýyl «Qyzyltaý qyrandary» atalǵan keńestik kezeńnen kele jatqan mádenıet úıi aýdandyq mádenıet úıiniń menshigine berilip, kúrdeli jóndeýden ótkizildi. Qazir bul ǵımaratta ýchaskelik polısııa pýnkti, poshta bólimshesi, aýyldyq okrýg ákimdigi jáne veterınarııa qyzmeti ornalasqan. Byltyr mektep pen mádenıet úıiniń qazandyqtary jańǵyrtyldy. Aýdandaǵy iri áleýmettik nysan – «Shapaǵat» balalardy ońaltý ortalyǵy Aqjarda ornalasqan. «Aýyl tynysy» taqtasynda aq­jar­lyqtardyń mádenı-sporttyq hám qoǵamdyq is-sharalary kórinis taýypty. «Gúlder-aı», «Ájeler» ansambli sııaqty jergilikti ónerpazdar men shyǵarmashylyq ujymdardyń qatysýymen «Aýylym – altyn besigim» baıqaýynda Gran-prı, «Asyl mura» baıqaýynda bas júldeni jeńip alǵan aqjarlyqtar ardagerlerge, batyr ana­larǵa da jıi qurmet kórsetip, túrli sharalar uıymdastyryp turady. «Týǵan jerge – taǵzym» aksııasy aıasynda jerles kásipkerlerdiń kómegimen aýyldyń kireberisine arka, aýyl ishine sahna, balabaqsha átkenshekteri ornatylyp, kómir qoımasy salyndy jáne sport úıirmesine kúres kilemi syıǵa tartyldy. Dýlat Shabdanov esimdi jeke kásipkerdiń avtobýsymen Alakól jaǵalaýyna áleý­mettik jaǵdaıy tómen otbasylardy demalýǵa tegin tasymaldaý dástúrge aınaldy. Sońǵy jyldary Úrjar aýdanyn­da kógaldandyrý, abattandyrý ju­mystaryna kóp kóńil bólinip otyr. Aýdan ákiminiń bastamasymen kóktem, jaz jáne kúz maýsymdarynda turaqty túrde senbilik ótkizildi. «Bulaq kórseń, kózin ash!» atty aýdandyq aksııaǵa aq­jarlyqtar da erekshe úles qosyp, júzdegen aýyl jastary belsene atsalysa bastady. Iаǵnı, aýyldyń taýǵa órleıtin tusyna kóterilgen turǵyndar ózen jaǵa­laýy men ár jerde burqyldap shyǵyp jatqan tuma-qaınarlardyń kózin arshyp, aryqtardy tazalaıdy, mal aıaǵynan qorý úshin qorshaıdy. Nátıjesinde, baý-baqshasy jaıqalǵan aýylǵa bulaq sýlary syldyrlap, tap-taza bolyp aǵady. Mektep jylyjaıynda oqýshylardyń bıologııa, eńbek sabaqtaryn ótkizip, ǵylymı-zertteý jumystaryn júrgizýine jaǵdaı jasalǵan. «Jasyl el» eńbek jasaqtaryna qatysýshy stýdentterdiń kómegimen kóshe jıekterine gúl egiledi. Bul – aýyl stýdentterin eńbekke baýlýmen birge, qosymsha tabys tabýyna múmkindik berip otyr. Osy jumystardyń qorytyndysynda, Aqjar aýyly «Úzdik abattandyrylǵan aýyl» baıqaýynda júldeli orynǵa ıe boldy. «Jas kelse – iske» deıdi. Dese de, aýyl basshysy ıgi isterdiń atqarylýyna aýdandyq máslıhat depýtaty Ryshan Jankúshikova bastap, kóptegen aýyl azamattarynyń qoldaý kórsetip kele jatqanyn jetkizdi. – Prezıdent janyndaǵy Memlekettik basqarý akademııasynda biliktiligin jetildirý kýrsynan ótip, Astanada ótken «Nur Otan» partııasynyń XV sezine qatystym. «Nur Otan» partııa­sy Tóraǵasynyń birinshi orynbasary A.Myrzahmetovtiń Alǵys hatyna ıe boldym. Bul Elbasymyzdyń jastardy qoldaý saıasatynyń jemisi dep oılaımyn. Múnyń barlyǵy bizge zor jaýapkershilik júkteıdi, – dedi T.Shomanov. Dýman ANASh, «Egemen Qazaqstan» Shyǵys Qazaqstan oblysy, Úrjar aýdany