Eń asyl qundylyq – el tutastyǵy
Ońtústik Qazaqstan oblysy etnomádenı birlestikteriniń ókilderi memleketimiz Táýelsizdiginiń 25 jyldyǵyna oraı Shymkent shaharynyń ortalyǵynan «Qazaq eline myń alǵys» monýmentin turǵyzyp jatyr. Bul – qıly taǵdyr-talaıymen qazaq jerinen pana taýyp, qamqorlyq kórgen, osy memleketti týǵan Otany kóretin ulttar men ulystardyń jaqsy nıetinen týǵan bastama.
Dál qazirgideı jahandyq daǵdarys jaǵdaıynda birlik, yntymaq ulttar arasyndaǵy jarasymdylyq burynǵydan da keregirek. Biz muny jaqsy túsinemiz. Máselen, ótken jyldyń ózinde Elbasynyń Joldaýy men Ult Josparyn nasıhattaý, halyqqa keńinen jetkizý jolynda etnomádenı birlestikterdiń tóraǵalary júzdegen eldi mekende 120 kezdesýge qatysyp, ulttar dostyǵynyń negizin nyǵaıtýǵa kúsh saldy.
Qazir Qazaqstandaǵy ultaralyq tatýlyq ózgelerge úlgi. Buǵan dálel álemde teńdesi joq Qazaqstan halqy Assambleıasyn qurdyq. Kóp ultty elimiz osy syndarly saıasattyń arqasynda ózara tatý-tátti ǵumyr keship, ósip-órkendeýde. Kezinde «Qazaqstan yntymaǵy jarasqan el bolady» degenge kúmánmen qaraǵandar búginde Uly Dala eline qyzyǵa da qyzǵana qaraıdy. Muny nege aıtyp otyrmyn, bir shańyraq astyna uıysqan birligi bekem el ǵana kez kelgen qıyndyqty eńseredi.
Ońtústik Qazaqstan oblysy – san ulttyń basyn qosqan óńir. Munda etnostardyń basyn biriktiretin 20 etnomádenı birlestik jumys isteıdi. Daǵdarys kezinde kerilip jatqan eshqaısysy joq. Barlyǵy da kezinde baýyryna basyp, qanatyn qataıtqan eldiń ýyǵyn nyqtasý qamynda. Kóshti kerýenimen kóshiretin yqpaly bar daǵdarys óz degenin jasap jatqanymen, eseli eńbek pen myzǵymas tatýlyq qazaqstandyqtardy jarqyn bolashaqqa jeteleıdi. Qazaq aıtatyn «Jumyla kótergen júk jeńil» deıtin taǵylymdy sózdiń máni de osynda bolsa kerek.
Iá, daǵdarystyń bári ótkinshi, ótedi de ketedi. El táýelsizdigi, ult muraty, urpaq bolashaǵy sııaqty qundylyqtar ǵana máńgi. Elbasy osylaı dedi. Álemniń aýzy dýaly saıasatkerleri bıyl Qazaqstanda aıtarlyqtaı ósim bolatynyn boljaýda. О́ıtkeni, Prezıdenttiń sózine súıensek, jahandyq daǵdarys – bul qaýippen qatar jańa múmkindikter. Jahandaǵy kóptegen memleketter dál daǵdarys tusynda tabysty bola bildi. Eń bastysy, rýhy bıik, eńbegi eren, birligi myǵym «Máńgilik El» bolý úshin bizde bári bar.
Qazaq halqynda «Baq yntymaqqa barady» degen sóz bar. Árqıly aıtylǵanymen, beıbit ómirdi súıetin álemniń bar halqynyń tilegi osy. Qazaqstan halqy Assambleıasy osyndaı izgi maqsatqa qyzmet etip keledi.
Iýrıı Kırıýhın,
Ońtústik Qazaqstan oblystyq slavıan etnomádenı birlestiginiń tóraǵasy
ShYMKENT
