EKPA-nyń sessııasyna qatysty

Senat Tóraǵasynyń orynbasary Asqar Beısenbaev bastaǵan Qazaqstannyń parlamenttik delegasııasy Eýropa Keńesi Parlamenttik Assambleıasynyń kóktemgi sessııasyna qatysty. Delegasııa quramyna senator Georgıı Kım engen bolatyn, dep habarlady Senattyń baspasóz qyzmeti. Senatorlar Parlamenttik Assambleıanyń tóraǵasy Pedro Agramýntpen, GFR Býndes­tagy­nyń depýtaty Aksel Fıshermen, ıspandyq depýtat Jordı Chýklamen, sondaı-aq, Bolgarııa Halyq jınalysynyń depýtaty Hamıd Hamıdpen ekijaqty kezdesýler ótkizdi. EKPA Saıası máseleler jáne demokratııa jónindegi komıtetiniń otyrysynda kún tártibindegi «Eýropalyq Keńestiń Qazaqstanmen qatynastary» tarmaǵyn talqylaý aıasynda Assambleıa depýtattary A.Fısher jáne J.Chýkla sóz alyp, bizdiń elimizde ótken Parlament Májilisiniń saılaýy týraly oń pikir bildirdi jáne Qazaqstandy Eýropalyq Keńestiń senimdi áriptesi jáne aımaqtaǵy turaqtylyq tiregi retinde atap ótti. EKPA depýtattary demokratııalyq qoǵam­nyń odan ári damýy jolynda eleýli tabystarǵa qol jetkizgen Qazaqstan men Eýropalyq Keńestiń yntymaqtastyǵyn ny­ǵaı­týdyń mańyz­dylyǵy jóninde ortaq pikir­de boldy. Senat Tóraǵasynyń orynbasary Eýropalyq Keńestiń qylmystyq sot tóreligi salasyndaǵy konvensııalaryna Qazaqstannyń qosylýy basym mindet ekenin atap ótti. Ol eýropalyq áriptesterdi bes ınstıtýttyq reforma – Ult Jospary mazmunymen, «Nurly Jol» ınfra­qurylymdyq damý baǵdarlamasymen, sondaı-aq, demokratııalyq reformalardy odan ári iske asyrý jónindegi qabyldanǵan sharalarmen tanystyrdy.