Elgezektigimen erekshelengen Evgenıı

Taǵdyrdyń jazýymen Qazaqstanda týyp, osy eldiń bolashaǵy úshin aıanbaı eńbek etip jatqan azamattar jeterlik. Qazaq halqynyń salt-dástúrin saqtap, ádet-ǵurpyn dáriptep, tilin meńgerip, qazaq emes, biraq, qazaqtan bylaı emes ózge ult ókilderi kópshilik. Ulttar yntymaǵy men birligin berik ustanǵan kópultty elimizdiń ózgeden basty ereksheligi de osy bolsa kerek. Qyzylorda oblysynda bir shańyraq astynda ómir súrip jatqan túrli etnostar ózderiniń tól mádenıetin, tili men salt-dás­túrlerin saqtap otyr. Osyndaı bir shańyraq astynda ómir súrip jatqan otbasylardyń biri dep Aral aýdany Jaqsyqylysh kentindegi orys ultynyń ókili Kýrbatovtardy aıtýǵa bolady. Bizdiń búgingi keıip­kerimiz Evgenıı Kýrbatov osy otbasynda 1978 jyldyń 20 tamyzynda dúnıege kelgen. Onyń dostary aýyldyń qaradomalaq balalary edi. Osy qaradomalaq aýyl balalarymen birge asyq oınap, láńgi teýip, qumǵa aýnap ósken E.Kýrbatovtyń tili qazaqsha shyqty. 1985 jyly Jaqsyqylysh kentindegi №19 orta mekteptiń alǵash tabaldyryǵyn attaǵan bala­qaı bilim ordasyn qazaq tilinde aıaq­tady. Al eń alǵash eńbek jolyn «Araltuz» AQ-ta jumysshy bolyp bastaǵan ol 2003 jyly Q.Jubanov atyndaǵy memlekettik ýnıversıtettiń deneshynyqtyrý jáne sport fakýltetine túsip, ony 2008 jyly bitirdi. Qazaqy aýylda, kóp qazaq ortasynda ósken, qazaqy tálim-tárbıe alǵan E.Kýrbatov ómirlik jaryn da qazaq qyzynan tańdady. О́mirdegi qol ustasqan jary Gúlmıra Sár­senbaeva ekeýi – eki qyz, bir ul tár­bıelep otyrǵan aýyldaǵy úlgili otbasylardyń biri. Anasy Tatıana Dmıtrıevna – 40 jyl oqýshylarǵa orys tilinen dáris bergen qart ustaz. Qazir qurmetti zeınetker, nemereleriniń súıikti ájesi. E.Kýrbatov 2004 jyldan bas­tap Aral aýdandyq balalar men jasóspirimder sport mektebiniń voleıbol bólimshesine jattyqtyrýshy bolyp jumysqa qabyldandy. Al 2008 jyly Sekseýil kentinde balalar men jasóspirimder sport mek­tebiniń ashylýyna baılanysty sol mektepte voleıbol bólimshesine jattyqtyrýshy bolyp aýysty. Ol 2005-2009 jyldary Qyzylorda oblysynyń voleıbol erler qurama komandasynyń múshesi, al 2010 jyldan beri Aral aýdandyq voleıbol erler qurama komandasynyń aǵa jattyqtyrýshysy bolyp eńbek etip keledi. Osy kezeńde jetken jetistikteri de jeterlik. Atap aıtar bolsaq, «Úzdik tóreshiligi» úshin dıplom alsa, voleıboldan erler arasynda ótken oblys birinshiliginiń «Úz­dik qorǵaýshysy» atalymymen, Qy­zylorda oblysy voleıbol fede­rasııasynyń qurylǵanyna 50 jyl tolýyna arnalǵan federasııa kýbo­gynyń «Úzdik shabýylshy» atalymymen marapattalǵan. Qyzylorda oblysynyń dene tárbıesi jáne sport basqarmasynyń, Aral aýdandyq týrızm jáne sport bóliminiń «Maq­taý qaǵazymen» birneshe márte marapattalǵan. Al jary Gúlmıra da Evgenıımen birge salamatty ómir saltyn qalyp­tas­tyrýda. Gúlmıra 2010 jyly Qy­zylorda qalasyndaǵy Qorqyt Ata atyndaǵy memlekettik ýnıversıtetin bitirdi. №20 Aral aýdanynyń  balalar men jasóspirimder sport mektebinde voleıbol bólimshesiniń (qyz balalar) jattyqtyrýshysy bolyp jumys jasaıdy. Aral aýdanynyń voleıbol áıelder quramasynyń kóshbasshysy. 2006 jyldan bastap Qyzylorda oblysynyń voleıbol áıelder quramasynyń múshesi. Bir otbasynyń uıytqysy bola bilgen aıaýly ana, súıikti jar. Erjan BAITILES, «Egemen Qazaqstan» Qyzylorda oblysy, Aral aýdany Sýrette: ortada turǵan E.Kýrbatov