Qazaq saltymen qyz uzatý

ózge ult ókilderi toıynyń sáni boldy Aqtóbe qalasyndaǵy «Analar úıinde» qyz uzatý toıy ótti. Osy úıdiń 18 jas­taǵy Evgenııa Arseneva esimdi qyzy turmysqa shyǵyp, uzatyldy. Toıdyń ózin «Analar úıiniń» dırektory Tańsulý Laqova uıymdastyrdy. Bul úıden talaı qyz uzatylyp, turmysqa shyqqan. Al osy jolǵy toıdyń bir ereksheligi, jańa ómirge aıaq basqan jastar ózge ult ókilderi bolǵanymen, quda túsý, kelin alý rásimi qazaqy salt-dástúr­men ótti. Evgenııa Arseneva «Analar úıinde» 8 aıdan beri turyp kelipti. Onyń Danıl esimdi 3 aılyq uly bar. Osy ýaqytta Evgenııa bolashaq jary Mıhaıl Maslovpen kezdesip, ekeýi bir-birine ǵashyq bolypty. Kúıeý jigit Evgenııany bir kórgennen unatypty. Keıin Mıhaıl Evgenııamen jıi kezdesken saıyn ǵashyq bolǵanyn jasyrmaıdy. «Jenıa maǵan birden unady. Unaǵan adamdy umytý ońaı ma, ekeýmiz jıi kezdesetin boldyq. Sóıtip, ǵashyq bolyp qaldym. Ol maǵan balasynyń bar ekenin aıtty. Biraq men oǵan kóz juma qaradym. Eń bastysy, ekeýmizdiń mahabbatymyz mańyzdy. Al bala bizdiń bolashaǵymyz. Ony týǵan ulym­daı tárbıeleımin», – deıdi Mıhaıl. Jenıa bolsa, Danılden basqa da bala súıgisi keletinin aıtady. «Men Mıhaılge adal jar, balalarymyzdyń súıikti anasy bolamyn. Maǵan odan basqa baqyt joq», – deıdi. Qazir erli-zaıyptylar bolashaqqa josparlaryn quryp qoıǵan. Mıhaıl Aqtóbeniń  shetinen jer alyp, úı salýdy maqsat etip otyr. «Analar úıiniń» dırektory Tańsulý Laqovanyń aıtýynsha, jas otbasy ázirge úı jaldap turady. Keıin Mıhaıl jer alyp, úı salyp jatsa, sonda kóshedi. Al jalpy, Tańsulý Laqova «Analar úıinen» óz teńin taýyp, turmys quryp jatqan qyzdar kóp», – deıdi. «Analar úıi» ashylǵannan beri osy jerde 10 toı bolypty.  Al qazir munda 13 jas ana sábılerimen turyp jatyr. Bári de turmys qurýdy maqsat etip otyr. Dastan KENJALIN, «Egemen Qazaqstan»