Álıhan álemi

Taıaýda Astanadaǵy Ulttyq muraǵat ǵımaratynda IýNESKO belgilegen merekelik is-sharalar aıasynda «Alashorda» qazaq ulttyq úkimetiniń kóshbasshysy jáne tóraǵasy, I Memlekettik Dýmanyń depýtaty, túrki halyqtarynyń ardaqty uly Álıhan Bókeıhannyń 150 jyldyǵyna arnalǵan «Álıhan Bókeıhan – Alash kósemi» atty dóńgelek ústel jáne kórnekti saıas­ı qaıratkerdiń mereıtoıy qurmetine belgili qazaqstandyq sýretshi E.Aıtýarovtyń «Táýelsizdik úshin kúresken Álıhan» kartınasynyń tusaýkeseri ótkizildi. Shara maqsaty – XX ǵasyr basyn­daǵy qazaq ıntellıgen­sııa­synyń kórnekti ókilderiniń shyǵarmashylyq murasyn nasıhattaı otyryp, Qazaqstannyń ter­rıtorııalyq tutastyǵyn qor­ǵap qalǵan qazaq eliniń dańqty ulynyń taǵdyryna qatysty jaıttardan qulaǵdar etý. Dóńgelek ústeldi Ulttyq muraǵat dırektory Marat Ábsemetov ashty. Sodan soń L.N.Gýmılev atyndaǵy EUÝ prorektory Dıhan Qamzabekuly, «Otyrar kitaphanasy» ǵylymı-zertteý ortalyǵynyń dırektory, alashtanýshy ǵalym Tursyn Jurt­baı, Memlekettik tarıh ıns­tıtýtynyń dırektory, tarıh ǵylymdarynyń doktory, professor Búrkit Aıaǵan, t.b. alys-jaqyn shetel tarıhshy-ǵalymdary men muraǵatshylar qaýymy qatysyp, esimi ısi túrikke máshhúr bolǵan ar­daqty Alash ulynyń ómirinen tyń derekter keltirdi. Taqyryp tóńireginde Álıhan Bókeıhannyń qoǵamdyq-saıası jáne ǵylymı qyzmeti jaıynda erkin pikir almasýlar bolyp, qujattyq kórmeden tyń dúnıeler tanystyryldy. Onda «Alashorda» partııasy kósh­basshysynyń qujattary (bilim attestaty, tutqyndalýshynyń anketasy, tergeý hattamalary, foto jáne beınequjattar jáne t.b.), Á.Bókeıhan men «Alash» saıası partııasy qozǵalysyna qatysty ja­zylǵan qazaqstandyq jazýshylar men ǵalymdardyń eńbekteri kóp­shilik nazaryna usynyldy. Raýshan TÁÝIRHANQYZY, «Egemen Qazaqstan»