El ekonomıkasyn damytýdy qamtamasyz etýdiń negizi – tıimdi kólik-logıstıka ınfraqurylymyn qurý
Májilistiń Ekonomıkalyq reforma jáne óńirlik damý komıteti elimizdiń Investısııalar jáne damý mınıstrliginde kóshpeli otyrys ótkizdi. Otyrysqa atalǵan komıtet tóraǵasy Roman Sklıar jetekshilik etti, dep habarlady Májilistiń baspasóz qyzmeti.
Onda Qazaqstan ekonomıkasynyń ornyqty damýyn qamtamasyz etýdiń negizgi baǵyty retinde tıimdi kólik-logıstıka ınfraqurylymyn qurý máselesi áńgime ózegine aınaldy. Aıta keteıik, «100 naqty qadam» Ult Josparynda Qazaqstannyń ınfraqurylymyn damytýda eń aldymen kólik-logıstıka salasyn jolǵa qoıýǵa aıryqsha nazar aýdarylǵan.
Talqylanatyn taqyryptyń mańyzdylyǵyn negizge alǵan Parlament Májilisi Tóraǵasynyń orynbasary Vladımır Bojko kóshpeli otyrysqa ózi qatysyp, ózekti máselelerdi qozǵady. Ol «100 naqty qadam» Ult Josparyn zańnamalyq qoldaý turǵysynan atqarylǵan jumystardy sóz ete kelip, jol-kólik ınfraqurylymyn damytý, kóliktik logıstıka jáne áýe tasymalyna qatysty qabyldanǵan zańdardyń basymdyqtaryna toqtaldy.
Sondaı-aq, V.Bojko aǵymdaǵy jyldyń qańtarynan bastap kásipkerlik qyzmet pen iskerlik belsendilikti arttyrý, aımaqtardyń ekonomıkalyq ósimin yntalandyrý, eńbekpen qamtý, sonyń ishinde, kólik jáne logıstıka salasyn nyǵaıtýǵa arnalǵan zańdyq qujattardy aıta kelip: «Bul zańnamalyq normalardyń barlyǵy kólik salasyndaǵy jobalardy júzege asyrýǵa otandyq óndirýshiler men turǵyndardy keńinen tartýǵa jol ashady. «Nurly Jol» baǵdarlamasynda atap kórsetilgendeı, kólik-logıstıka ınfraqurylymy elimiz óńirleri arasyndaǵy ekonomıkalyq baılanystardy júzege asyrýda, sondaı-aq, qazaqstandyq taýardy álemdik naryqqa eksporttaýda negizgi jetekshi qural bolý kerek», dedi.
Odan ári Investısııalar jáne damý birinshi vıse-mınıstri Jeńis Qasymbek baıandama jasap, osy salada atqarylǵan jumystar men alǵa qoıylǵan maqsattar jaıynda áńgimeledi.
Talqylaý barysynda Ekonomıkalyq reforma jáne óńirlik damý komıteti músheleri elimiz óńirlerindegi joldardyń adam tózgisiz jaǵdaıyna qatysty arnaıy ázirlengen beınetaspany kórsete otyryp, mınıstrlik ókilderinen naqty jaýap aldy.
Sharaǵa Májilis depýtattarymen qatar, Investısııalar jáne damý, Ulttyq ekonomıka, Qarjy mınıstrlikteriniń, «Samuryq-Qazyna», «Qazaqstan temir joly», «Atameken» Ulttyq kásipkerler palatasynyń ókilderi qatysty.
