«Qazaqstan barysy» – babalar dástúri

Qazaqstan halqy Assambleıasynyń múshesi, «Ahyska» túrik etnomádenı bir­les­­tiginiń tóraǵasy, qalalyq máslı­hat­­­tyń depýtaty Zııatdın Kasanovtyń demeý­­shiligimen «Nur Otan» partııasynyń Ala­­taý aýdandyq fılıaly jáne aýdan ákimdiginiń uıymdastyrýymen «Qazaqstan barysyna» irikteý týrnıri ótti. Dodany uıymdastyrýdaǵy basty maqsat: ult densaýlyǵyn nyǵaıta otyryp, jastardy sportqa baýlý. Sonymen qatar, keshegi taý kótergen alyp batyr babalarymyzdyń rýhyn dáriptep, halqymyzdyń salt-dástúrin órkendetý. Almatydaǵy jańadan qurylǵan Alataý aýdany «Uljan» shaǵyn aýdanyndaǵy №152 mektep-gımnazııasynda Tuńǵysh Prezıdent N.Á.Nazarbaevtyń júldesi úshin ulttyq sport túri – qazaq kúresinen «Qazaqstan bary­sy» respýblıkalyq týrnırine aýdan boıynsha irikteý jarysy ótti. Jyl saıyn ótkizilip turatyn bul dodaǵa bıyl nıet bil­dirýshilerdiń qarasy kóp boldy. 1985-1995 jyldar aralyǵynda dúnıege kelgen jigitter bilek sybana kirisken jarystyń nátı­je­sinde birinshi orynǵa Álimjan Jumahmetov ıe bolsa, ekinshi oryn Maǵjan Seıithanǵa buıyrdy. Al úshinshi orynǵa Danııar Bektursynov taban tiredi. Irikteýden ótken sportshylar 2 mamyr kúni «Balýan Sholaq» atyndaǵy sport saraıynda ótetin qalalyq irikteýge joldama aldy. Bul balýandarymyzdy alda áli talaı úlken doda kútip tur degen senimdemiz. Sondaı-aq, qaıyrymdylyq jasap, kómek qolyn sozýdy dástúrge aınaldyrǵan Zııatdın Kasanovtyń uıymdastyrýymen Medeý aýdanyndaǵy «Rıtm» meıramhanasynda Muhammed paıǵambardyń týǵan kúni – «Máýlit» merekesine oraı ótken konferensııa sońynan as berildi. Atalǵan is-sharaǵa Túrkııanyń Almatydaǵy Bas konsýly Ryza Kagan Iylmaz, Almaty qalasynyń ımamy Nurbek Esmaǵanbet, Qazaqstan halqy Assambleıasynyń músheleri, Túrkııadan kelgen qonaqtar jáne Z.Kasanovqa óz senimderin bildirip, máslıhat depýtattyǵyna saılaǵan Alataý aýdany 26-okrýginiń turǵyndary qatysty. Is-shara sońynan kelgen qonaqtarǵa estelik syılyqtar, Quran kitaptary tabys etildi. Gúlzeınep SÁDIRQYZY, «Egemen Qazaqstan» ALMATY