Keshe Máskeýde Qazaqstannyń Reseıdegi elshisi Marat Tájın Máskeý memlekettik ýnıversıtetiniń Azııa jáne Afrıka elderi ınstıtýtynyń (MMÝ AAEI) qurylǵanyna 60 jyl tolýyna arnalǵan saltanatty májiliske qatysty.
О́ziniń sózinde Qazaqstan elshisi Marat Tájın MMÝ AAEI – kásibı shyǵystanýshylar men afrıkatanýshylar, is júzinde Azııa men Afrıkanyń barlyq elderi men óńirleri boıynsha mamandar daıyndaýda jetekshi álemdik ortalyqtardyń biri ekenin atap kórsetti.
M.Tájın, sondaı-aq, MMÝ AAEI-diń Qazaqstanǵa shyǵystaný salasynda mamandar daıyndaýǵa qosyp kele jatqan úlken úlesin kóldeneń tartty.
«Búginde MMÝ AAEI-di bitirip shyqqan kóptegen qazaqstandyqtar elimiz ekonomıkasynyń túrli salalary men baǵyttarynda jemisti jumys istep júr. Osy qabyrǵada alǵan bilimderi tájirıbemen tolyqtyrylyp otyrǵandyqtan, olar Qazaqstandy shetelderde de laıyqty kórsetip keledi. Tek sońǵy jyldyń ózinde MMÝ AAEI-de túrli mamandyqtar boıynsha 20-dan astam qazaqstandyq oqyp, tájirıbeden ótti», – dedi Qazaqstan elshisi.
Dıplomat, sonymen qatar, MMÝ AAEI-de Azııa men Afrıka halyqtarynyń 40-tan astam tilimen qatar, joǵary kásibı deńgeıde qazaq tili de oqytylyp kele jatqanyna nazar aýdardy. Qazaqstandyq JOO-larmen jáne zertteý ortalyqtarymen tyǵyz áriptestik baılanystar jolǵa qoıylǵan.
Budan bólek, ol 2015 jyly MMÝ AAEI-diń bazasynda Qazaq handyǵy qalyptasýynyń 550 jyldyǵyna arnalǵan «Túrki elinen Qazaq handyǵyna deıin» dep atalatyn halyqaralyq ǵylymı-praktıkalyq konferensııany birlesip ótkizýdiń tabysty tájirıbesi júzege asqanyn atap ótti. Saltanatty májilis konserttik baǵdarlamamen aıaqtalsa, onyń barysynda MMÝ AAEI-diń stýdenttik kvarteti qazaqtyń «Armandastar» ánin oryndady.
«Egemen-aqparat»