Memleket basshysy Qasym-Jomart Toqaevtyń Jarlyǵymen elimizge belgili akter, talantty rejısser Juldyzbek Jumanbaıǵa «Qazaqstanǵa eńbek sińirgen mádenıet qaıratkeri» qurmetti ataǵy berildi. Memlekettik joǵarǵy nagradany Abaı oblysynyń ákimi Berik Ýálı tabystady, dep habarlaıdy Egemen.kz.
Juldyzbek Aıtqalıuly – 1982 jyly Abaı aýdany, Keńgerbaı bı aýylynda týǵan. 1999-2002 jyldary M.Tólebaev atyndaǵy mýzyka kolledjiniń «Akter» bólimin bitirgen. 2002-2006 jyldary T.Júrgenov atyndaǵy Qazaq ulttyq óner akademııasynyń «Estradalyq mınıatıýra» bólimin támamdady. 2012-2014 jyldary «Bolashaq» baǵdarlamasymen Máskeýdegi «Teatr óneri» ınstıtýtynyń (GITIS) «Rejısser» mamandyǵy boıynsha magıstr dárejesin aldy. 2015 jyldan beri Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda rejısser, M.Áýezov atyndaǵy Qazaq ulttyq drama teatrynda rejısser, «Alataý» dástúrli óner teatrynda kórkemdik jetekshi, Astanadaǵy Á.Mámbetov atyndaǵy memlekettik drama jáne komedııa teatrynda bas rejısser qyzmetterin atqardy. Sonymen qatar onyń elimizdiń ár óńirinde spektaklderi qoıylyp, kórermen yqylasyna bólendi.
Juldyzbek Jumanbaıdy áýeli kópshilikke tanymal etken «Qyzyl oramaldy shynarym» qoıylymyndaǵy Ilııas róli edi. Ol Ǵ.Músirepov atyndaǵy Balalar men jasóspirimder teatrynda 8 jyl akter bolyp, kóptegen rólderdi erekshe somdady.
«Men buryn mundaı nagrada tek tamyr-tanys arqyly keledi dep oılaýshy edim. Rasynda olaı emes eken. О́z salańda adal qyzmet qylsań, Abaı atam aıtqandaı, ataq ta, abyroı da óz aıaǵymen keletine kózim jetti. Men mundaı mártebeli ataq alamyn dep kútpedim. Byltyr hakim Abaıdyń 180 jyldyq toıynda «Bala Abaıdan – dana Abaıǵa deıin» degen dala teatryn qoıdyq. Sonda oblys ákimi Berik Ýálıuly bul eńbegimizdi joǵary baǵalap edi. Qoldaý kórsetip jatqan týǵan eldegi azamattarǵa raqmet», deıdi Juldyzbek Jumanbaı.
Onyń rejısser retinde qoıǵan qoıylymdary: A.Qunanbaev – (qara sóz) «Qara», V.Shekspır – «Bir sen úshin týdym» («Romeo ı Djýletta»), N.Gogol – «Revızor», «Baıan sulý – Qozy Kórpesh», G.Gorın – «Umytyńdar ony», A.Gernı – «Mahabbat hattary», N.Saımon – «Kúzgi poker», G.Hýgaeva – «Ittiń balasy» («Chernaıa býrka»), N.Týtov – «Gúlder hıkaıasy», Shákárim – «Jolsyz jaza», Shákárim, Maǵaýııa, Muhtar – «Abaı aıtqan «Eńlik-Kebek», M.Áýezov – «Aıman-Sholpan», M.Áýezov – «Jetim», S.Muratbekov – «Jýsan ıisi», O.Bókeı – «Qar qyzy», T.Ahtanov – «Kúshik kúıeý», D.Isabekov – «Mahshar túndegi mahabbat», R.Muqanova – «Bopaı hanym», Iran-Ǵaıyp – «Án-Muhıt», M.Maqataev – «Raıymbek, Raıymbek», B.Qadyr – «Ar adamy. Baýyrjan», M.Maǵaýın – «Jarmaq», S.Sybanbaı – «Ulym qashan kelesiń?» t.b jıyny 30-ǵa jýyq spektakli qoıyldy.
Marapattary: «Altyn saqa» – «Úzdik rejısser» (2017), «Qazaqstan Respýblıkasynyń mádenıet salasynyń úzdigi» (2022), Qazaqstan teatr qaıratkerleri odaǵynyń kásibı syılyǵy «Eńlikgúl-2025» boıynsha jyldyń «Eń úzdik rejısseri».
Abaı oblysy