О́SKEMEN. 18 mamyr. Shyǵys Qazaqstan oblysynyń ákimi Danıal Ahmetov jaýapsyz merdigerler tizimine engizý týraly talap-aryzdardy sotqa ýaqytynda usynýdy jáne baqylaýdy kúsheıtýdi talap etti. Sebebi, óz isine salǵyrt qaraıtyn kompanııalardyń is-áreketteriniń kesirinen birqatar nysandar áli kúnge deıin paıdalanýǵa berilmeı otyr. Bul týraly oblys ákiminiń baspasóz qyzmetine silteme jasaǵan egemen.kz tilshisi habarlady.
Sonymen qatar, osyǵan deıin oblystyq qurylys basqarmasynyń birde-bir jumys merziminiń buzylý deregi boıynsha der kezinde sotqa talap-aryzdardy usynbaǵanyn aıtty. Búginde 24 memlekettik satyp alýǵa qatysýshynyń tek úsheýi ǵana jaýapsyz bolyp tanylyp, eki jyl boıy tenderlik úderisterge qatysý quqyǵynan aıyryldy.
«Sebebi, qurylys basqarmasynda jaýapsyz merdigerlerdiń naqty tizimi bolmaǵan. Osy másele boıynsha zańnamaǵa sáıkes jumys istep, dereý sotqa aryz berý kerek. Barlyq memlekettik organdar osy máselege nazar aýdarýlary tıis», – dedi Danıal Ahmetov.
Osyndaı kompanııalardyń áreketinen qan ortalyǵynyń, balabaqshalardyń, mektepterdiń, ınternat úıiniń, ońaltý ortalyǵynyń jáne ózge de kóptegen áleýmettik nysandardyń qurylysty aıaqtaý merzimderi uzaqqa sozyldy. Osyǵan baılanysty búgingi tańda tórt mekteptiń qurylysy, Zyrıan aýdanyndaǵy ońaltý ortalyǵyna tıesili ákimshilik ǵımarattyń jáne taǵy tórt nysannyń jańǵyrtý jumystary aıaqtalmaǵan.
Aıta keteıik, ótken jyldyń qorytyndysy boıynsha oblysta 118 qurylys nysanynyń salyný kestesiniń merzimi buzyldy.
Dýman Anash.
Derek: Shyǵys Qazaqstan oblysy ákiminiń baspasóz qyzmeti.
Foto: egemen.kz.