Keshe elimiz boıynsha, naqtylaı aıtqanda, oblystyq, qalalyq, aýdandyq kitaphanalar men Dostyq úılerinde, sondaı-aq, joǵary oqý oryndarynda bir ýaqytta memlekettik tilde «Máńgilik El» Patrıottyq aksııasyna arnalǵan jalpyqazaqstandyq ashyq dıktant jazý sharasy ótti.
Qazaqstan halqy Assambleıasynyń bastamasymen sınhrondy túrde uıymdastyrylǵan aksııaǵa 3 myńnan astam kitaphanadan bólek, JOO-lar men Dostyq úıleri belsene atsalysty. El azamattarynyń patrıottyq sezimderin nyǵaıta túsýdi, sondaı-aq, qazaq tiliniń mártebesin kóterýdi maqsat etken, Táýelsizdigimizdiń 25 jyldyǵyna oraı qolǵa alynǵan sharaǵa ulty, kásibi, jas ereksheligi ártúrli 20 myńnan astam adam qatysty.
Aksııanyń Astanadaǵy Ulttyq akademııalyq kitaphanada uıymdastyrylǵan ashylý rásiminde Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov bul sharanyń qoǵamymyzǵa, ásirese, jastarǵa óte qajet ekenine toqtala kelip: «Táýelsizdikten asqan qasıetti uǵym joq. Ol bizdiń basty qundylyǵymyz. Muny biz jurtshylyqqa túsindire bilýimiz kerek. Sondyqtan, osyndaı aksııany ótkizýdi qolǵa aldyq. Mundaǵy maqsatymyz – «Máńgilik El» ıdeıasyn halyq arasyna keńinen nasıhattap, onyń mán-mańyzyn túsindirý», – dedi.
Budan keıin sóz alǵan memleket qaıratkeri, belgili ǵalym Myrzataı Joldasbekov dıktant jazýǵa kelgen azamattarǵa sáttilik tilep, barlyǵynyń joǵary baǵa alýlaryna tilektes ekendigin bildirdi.
О́zimiz kýá bolǵan, ıaǵnı Astanadaǵy Ulttyq akademııalyq kitaphanada ótken dıktant jazý sharasyna ulttyq kompanııalar men memlekettik organdardyń qyzmetkerleri, jastar, Ulttyq ulan jáne Astananyń barlyq etnomádenı birlestikteriniń ókilderi qatysty.
Aıta keteıik, 230 sózden turatyn dıktant mátinin otandyq ǵalymdar daıyndaǵan. Onyń mazmuny patrıottyq taqyrypqa negizdelgen.
Jalpy, dıktantty fılolog oqytýshylar tekseredi. Qorytyndysy boıynsha «óte jaqsy» baǵa alǵandardyń esimderi atap ótiledi. Muny jyl saıynǵy dástúrge aınaldyrý josparlanýda. Aksııa qorytyndysy búgin belgili bolady dep kútilýde.
Joldybaı BAZAR,
«Egemen Qazaqstan»