Ońtústikte astyq orý bastalyp ketti. Kombaındar sary altyndaı jarqyraǵan alqapta kemedeı júzip júrgendeı áser qaldyrady. Negizinen, astyq bastyrý jyldaǵydan eki aptaǵa jýyq erte bastaldy. Mundaǵy sebep kóktem óte jańbyrly boldy da jazdyń basy aptapqa ulasty. Kóptegen sharýa qojalyqtary mezgilsiz jaýǵan jańbyr dánge toly bıdaı masaqtaryn jerge jatqyzyp tastaı ma dep qaýiptenip edi. Ol endi qorqynyshty emes deıdi.
Astyq máselesine kelsek, óńirde 198 myń gektarǵa masaqty daqyldar egilgen. Onyń 156,7 myń gektary bıdaı, 38,3 myń gektary arpa. Kombaın jatqasy, eń aldymen, oblys ortalyǵyna irgeles Qazyǵurt aýdanyndaǵy alqapqa salyndy. Mundaǵy 34 myń gektar jerge bıdaı, 3,2 myń gektarǵa arpa egilgen bolatyn.
«Amankeldi» JShS basshysy Nurlan Quralovtyń esimi respýblıkamyzǵa belgili. Júzimniń joǵary suryptaryn ósirip, kórshi memleketterge eksportqa shyǵaryp otyrǵan sharýashylyq basshysynyń 1,5 myń gektar egistigine alǵashqy oraq tústi.
– Memlekettik qoldaýdyń tıimdiligi dıqandardyń ónimdi eńbek etýine jaǵdaı týǵyzdy, – deıdi Nurlan Amangeldiuly. – Máselen, bıdaıymyzdyń ótken jylǵa qaraǵanda túsimdiligi 20 paıyzǵa artty. Qoldaǵy astyqty qaıda ótkizemin deıtindeı emes, qazirge deıin 30 myń tonna dándi kórshi О́zbekstan men Iran memleketi satyp alýǵa kelisimshart jasady. Búginde alqapta «Amankeldi» JShS-iniń 15 kombaıny men 12 KamAZ júk kóligi jumys istep jatyr.
Memleketimiz álemdik qarjy daǵdarysy qos ókpeden qyssa da taýar óndirýshilerge jaqsy kómek berýde. Máselen, jeńildetilgen baǵamen bosatylatyn mıneraldy tyńaıtqyshtardyń kólemi ótken jyldaǵydan aıtarlyqtaı artqan. Aldyn ala boljam boıynsha 197 gektar masaqty daqyldardan gektaryna 22 sentnerden ónim alynady degen úmit bar. Sonda Ońtústik dıqandary 430 myń tonnadaı rızdyq dánin jınamaq.
Baqtııar TAIJAN,
«Egemen Qazaqstan»
Ońtústik Qazaqstan oblysy