El turǵyndary 22 sáýirge qaraǵan túni erekshe astronomııalyq qubylysty –Lırıda juldyzdar jaýynyn tamashalaı alady, dep habarlaıdy Egemen.kz.
Astrofızıkter bul qubylysty eń belsendi kezeńinde baqylaýǵa bolatynyn aıtady. Lırıda – kóktemdegi eń kórnekti meteorlyq jaýyndardyń biri.
Ǵalymdardyń málimetinshe, 22 sáýir kúni shamamen Astana ýaqytymen 01:00-de meteor aǵynynyń pık kezeńi bolady. Bul ýaqytta saǵatyna 18–23-ke deıin «aqqan juldyzdy» kórýge bolady.
Mamandardyń aıtýynsha, meteor aǵynynyń radıanty Lıra shoqjuldyzy baǵytynda ornalasqan jáne ol jarqyraǵan Vega juldyzy mańynan baıqalady. Lırıdanyń belsendilik kezeńi 14 sáýirden 30 sáýirge deıin jalǵasady.
Mamandar bul qubylysty jaqsy kórý úshin qala jaryǵynan alys, aspany ashyq jerge shyǵý kerektigin aıtady. Aı jaryǵy aıtarlyqtaı kedergi keltirmeıdi, sondyqtan baqylaý jaǵdaıy qolaıly bolmaq.
Sondaı-aq, eń qolaıly ýaqyt – túnniń ekinshi jartysy, tańǵa jaqyn mezgil. Bul kezde meteorlardy anyq kórýge bolady.
Aıta keteıik, Lırıda juldyz jaýyny – adamzat 2600 jyldan astam ýaqyttan beri baqylap kele jatqan eń kóne astronomııalyq qubylystardyń biri. Onyń sebebi – 1861 jyly ashylǵan úlken kometa qaldyrǵan shań-tozań izi. Jer sol orbıtalyq izden jyl saıyn sáýir aıynda ótip, aspanda «juldyz jaýynyn» týdyrady.