Almatyda Qazaq taǵamtaný akademııasynyń qasynan qymyzdan túrli taǵamdar jasaıtyn zaýyt iske qosyldy. Ǵalymdardyń aıtýynsha, álemde mundaı óndiris orny alǵash bolyp Qazaqstanda ashylyp otyr eken.
Akademık, medısına ǵylymdarynyń doktory Tóregeldi Sharmanov Qazaq taǵamtaný akademııasynyń birneshe jylǵy ǵylymı jumystarynyń arqasynda osyndaı jetistikterge jetip jatqanyn aıtty.
– Sıyr sútindegi maı qyshqylynyń quramynda transmaıqyshqyly degen ýly zat bar. Al bıede ol joq. Osyǵan baılanysty biz mundaı sýsynnan ózge de taǵam túrlerin daıyndaý qajet degen oıǵa keldik. Sodan mán berip qarasaq, tortty, tátti bálishterdi, kámpıtti, shokoladty, balmuzdaqty jasaýǵa bolady eken.
Qymyzdan jasalǵan balmuzdaqtyń ereksheligi, quramynda adam densaýlyǵyna qaýipti hımııalyq qospalar joq. Onyń baǵasy da qymbat emes kórinedi. Mamandar aldaǵy ýaqytta budan bólek birneshe taǵam túrin shyǵarýdy josparlap otyr.
Aıan ÁBDÝÁLI,
«Egemen Qazaqstan»