Qazir Úkimet jumyssyzdyqty joıýǵa, otbasylyq kásipkerlikti qoldaýǵa, sondaı-aq, aýla sharýashylyǵyn damytýǵa kóńil bólýde. Eki qolǵa bir kúrek taba almaı otyrǵandardy jumyspen qamtamasyz etýde bul tıimdi bola túsýde.
Kimde-kim qolynan keletin sharýany júrgizemin dese, «Jumyspen qamtýdyń jol kartasy-2020» memlekettik baǵdarlamasy arqyly óz isin ashýyna ábden bolady. Mine, osyndaı qarjylaı qoldaý kórip, aýlasynan shaǵyn mal bordaqylaý alańyn ashyp, jumys jasap jatqandardyń biri – Alǵa aýdany Bestamaq aýylynyń turǵyny Rýslan Jıenalın.
Bestamaq aýyly qalanyń irgesinde ornalasqan. Rýslannyń úıi aýyldyń shet jaǵynda bolyp shyqty. Biz kelgende ol qaladan quramajem ákelip, túsirip jatyr eken. Qorapty «GAZel» mashınasynyń janynda jem túsirip jatqan jas jigitpen amandyq-saýlyqtan keıin, áńgime aýanyn bul kásipke qalaı kelgenine burdyq.
– Jalpy, men Oıyl aýdany Taısoıǵan aýylynda týyp-óstim. Eńbek jolymdy mehanızator bolyp bastadym. Aýylda jumys bolmaǵandyqtan, qalaǵa jaqyndaýdy sheshtim. Shyny kerek, qala mańyndaǵy qaı aýylǵa taban tireımin degende osy aýyldy kóńilim qalady. Shaǵyn úı satyp alyp, qonystandym. On úsh jyl «Aqtóbemunaıgaz» AQ-ta jumys istedim. Kishkentaıymyzdan eńbekke etene óskendikten vahtadan kelgen soń bos ýaqyt ótkizbeı bir sharýamen aınalysýdy jón kórdim, Sóıtip, aýyldardan mal satyp alyp, bordaqylap semirtýge kiristim. Bala kezimizden mal jaılap, baǵym-kútimine aralasyp óstik qoı. Sóıtip, mal semirtip, etin bazarǵa shyǵaryp, kóterme baǵamen ótkizip júrdim, – deıdi Rýslan inimiz.
Sharýamen kózi ashylǵan aýyl balasy alǵashqyda bir-eki bas baspaqty bordaqyǵa qoıyp kelse, kele-kele onyń sanyn kóbeıtip, soıýǵa keletinin soıyp satyp otyrǵan. Semirtýge qoıatyn maldy aýyl arasynan emes, Batys Qazaqstan, Qostanaı oblysynan satyp alyp otyrǵan, sebebi bul óńirde etti baǵyttaǵy qazaqtyń aq bas tuqymdy iri qarasy ósiriledi. Al, bizdiń iri qara tez qoń jınaı qoımaıdy, salmaǵy da jeńil bolyp keledi. Jas ta bolsa iri qaranyń tez salmaq qosatyn tuqymyn tanıtyn aýyldyń malsaq balasy emes pe?
– Sharýam júrgen soń munaı salasyndaǵy jumysymdy tastap, biryńǵaı mal ósirýge shyqtym. Ol úshin nesıe alý kerek boldy. Jeke kásipker retinde tirkelgenime ekinshi jyl. Bastapqyda bordaqylaýǵa 13 bas qoıdym. Qazir 27 basqa deıin jetti. Endi qora-qopsymyz tarlyq ete bastady. Sóıtip, kórshimniń qorasyn ýaqytsha paıdalanyp otyrmyn. Bolashaqta 100 iri qara bordaqylaıtyn shaǵyn mal bordaqylaý alańyn salýdy oılastyrýdamyn. Ol úshin aýyl ákimi jer bólýge ýáde berip otyr. Sáti tússe, sharýashylyǵymdy keńeıtpekpin, – deıdi ol.
Rýslan Jıenalın óz sharýasyn dóńgelentip júrgizý arqyly eki adamdy jumyspen qamtyp otyr. Bolashaqta jer bólinip, 100 iri qara bordaqylaıtyn alań ashyp jatsa, taǵy da birneshe aýyldastaryna jumys taýyp bermek.
Alǵa aýdandyq jumyspen qamtý ortalyǵynyń dırektory Aqbópe Ábdýalıevanyń aıtýynsha, aýdanda jumyssyzdyqty joıý jáne otbasylyq sharýashylyq túrlerin damytý maqsatynda 2016-2018 jyldarǵa arnalǵan arnaıy baǵdarlama qabyldanyp, ony iske asyrý jospary bekitilgen. Bul baǵdarlamaǵa qatysýǵa 171 aýyl turǵyny ótinish bildiripti.
– Bizdiń aýdan bul jobany osy jyldyń birinshi toqsanynda óńirde alǵashqy bolyp bastady. Búgingi tańda 108,6 mıllıon teńge qarajat ıgerildi. Jobaǵa oblystyq bıýdjetten «Aqtóbe aýyl mıkrokredıt» shaǵyn nesıe uıymy arqyly 30 mıllıon teńge qarajat bólinip, 7 jeke kásipkerge berildi. Onyń ishinde beseýi alǵan qarajatyn shaǵyn mal bordaqylaý alańyn ashýǵa, ekeýi saýyn sıyr alýǵa jumsady. Jeti kásipker barlyǵy 156 bas mal aldy. Sondaı-aq, 14 jańa jumys orny ashyldy. Respýblıkalyq jáne oblystyq qarajattan bólingen qarjyǵa, ıaǵnı «Aýyl kásipkeri» baǵdarlamasy jáne Aýyl sharýashylyǵyn qarjylaı qoldaý qorynyń óz qarajaty esebinen 31 jeke kásipker men sharýa qojalyqtaryna 78,6 mıllıon teńge qarjy bólinip, 195 iri qara, 94 usaq mal alynyp, 59 jumys orny ashyldy, – deıdi ol.
«Jumyspen qamtýdyń jol kartasy-2020» baǵdarlamasynyń ekinshi baǵyty boıynsha I transhqa 39,0 mıllıon teńge bólingenin, qazirgi tańda nesıe alý úshin 25 adam Aýyl sharýashylyǵyn qarjylaı qoldaý qoryna qujattaryn tapsyryp qoıǵanyn jetkizdi. Sondaı-aq, II transhqa qaralǵan 178,0 mln. teńgeniń 114,0 mln. teńgesi «Aqtóbe aýyl mıkrokredıt» shaǵyn nesıe uıymyna bólinip, budan úmitker 20 adam qujattaryn tapsyryp qoıypty. Osy baǵdarlama júzege asqan jaǵdaıda aýdan boıynsha 220-240 jumys orny ashylady dep kútilýde.
Satybaldy SÁÝIRBAI,
«Egemen Qazaqstan»
Aqtóbe oblysy,
Alǵa aýdany