Fýtboldan Fransııada ótip jatqan Eýropa chempıonatynyń sońǵy úsh kúninde 8 kezdesý oınaldy. Bulardyń deni týrnırdiń kelesi kezeńine shyǵatyn komandalardyń sulbasyn anyqtap berýge qyzmet etti. Osy kúnderdiń keneresinde bir toptaǵy oıyndar da tolyq oınalyp bitti. Atap aıtqanda, A tobyndaǵy komandalar ózara kezdesýlerin tolyq aıaqtady. Keshe túnde V toby da matchtaryn márege jetkizip toqtady. Al erteń barlyq toptarda qorytyndy shyǵyp bolady.
Biz buǵan deıingi jazbalarymyzda chempıonatta sensasııa bolmaǵanyn baıandaǵanbyz. Sol qalyp áli buzylǵan joq. Biraq osy esepti merzimdegi bir jańalyq – sol kezge deıin birde-bir ret oryn alyp kórmegen iri esepter tirkeldi. Olardyń ekeýi de 3:0 bolyp aıaqtaldy. Áıtkenmen, ony jasaǵan jasaqtar shyn máninde de qarsylastarynan aıtarlyqtaı basym edi.
Birinshi iri esepke qurlyqtyń sońǵy eki chempıonatynyń jeńimpazy, álemniń eks-chempıony Ispanııa quramasy Túrkııamen oıynda qol jetkizdi. Túrikterdiń bul týrnırde onshalyqty jarqyrap kórine qoımaǵanyn jurttyń bári bilip otyr. Quramynda Arda Týrannan basqa bas kóteretin eshkimi joq jamaǵat salǵannan súreńsiz oıyn kórsetip kele jatyr. Ol osylaısha munda alǵashqy oıynynda birdeı utylys tapqan Ýkraınadan keıingi ekinshi ujym boldy. Al ıspandar onymen kezdesýde máseleni ekinshi taımnyń bas jaǵynda-aq tolyq sheship aldy. Bul kezge deıin Alvaro Morata (34, 48-mınýttar) men Nolıta (37) soqqan goldardyń arqasynda oıyn taǵdyryn sheship alǵan olar sodan keıin qarqyndaryn edáýir basty. Sonda ǵana túrik «Aı-juldyzy» alǵa qaraı umtyldy. Biraq olarda oıly oıynnan góri asyp-sasý, kúıip-pisý kóbirek kórindi de, shabýyldyń durys nátıje berýine aparyp jetkize qoıǵan joq.
Buǵan qaraǵanda, Chehııa men Horvatııa arasyndaǵy oıyn tartystyraq ótti. Oıynnyń birinshi taımynda horvattar kóbirek tizginge ıe boldy. Sonyń áserimen olar Ivan Perıshıchtiń kúsh salýy arqyly 37-mınýtta birinshi bolyp esep te ashty. Tap osydan keıin komandanyń fanattary matchtyń toqtaýyna sebepkerlik etti. Olar alańǵa faıer laqtyryp, biraz tútindetse, ózderi otyrǵan sektorda tóbeles shyǵardy. Ázer qaıta jalǵasqan kezdesýde horvattar taǵy alǵa qaraı jóńkile shapty. Sol pármenimen 59-mınýtta Ivan Rakıtıchtiń goly arqyly esepti eseledi. Al chehtardyń oıyny eshbir júrmeı qoıdy. Olar alańǵa endi ǵana shyqqan Mılan Shkodanyń 76-mınýtta gol soǵýymen bir doptyń qarymtasyn qaıtara aldy. «Halyq komandasy» osynyń arqasynda kóńilderine úmit otyn jalǵap, qaýyrt qarsy shabýyldar uıymdastyra bastady. Buǵan kerisinshe óz jankúıerleriniń «otyna kúıip» kete jazdaǵan horvattarda biraz irkilis paıda boldy. Munyń sońy oısyz áreketterge aparyp soqtyrdy. Biz 88-mınýtta Domagoı Vıdanyń óz qaqpasy aldynda kórer kózge qolmen dop qaǵyp jiberýin tek osylaı baǵalaı alar edik. Osyǵan baılanysty belgilengen penaltıdi Tomash Nesıd múlt jibermedi. Esep – 2:2!
Osy kúngi úshinshi oıynda Italııa Shvesııany áreń utty. Ol buǵan 88-mınýtta Ederdiń gol soǵýy arqyly qol jetkizdi. Al senbi kúngi oıyndardyń shymyldyǵyn ashqan Belgııa – Irlandııa kezdesýinde osy kúndergi ekinshi iri esep tirkeldi. Matchtyń basynda bulardyń aldyńǵylary basym ekeni anyq baıqalyp turǵanymen, sońy talqandaýmen aıaqtalatynyn eshkim paıymdaı qoımaǵan shyǵar. Ǵalamattyń bári ekinshi taımda oryn aldy. Onyń alǵashqy 25-mınýtynda Romelý Lýkaký (48, 70) men Aksel Vıtseldiń (61) esebimen oıynnyń taǵdyry da sheshildi. Sóıtip, osy kúnderi Alvaro Moratadan keıin ekinshi oıynshy dýbl jasaldy.
Budan keıingi eki oıyn da teń aıaqtaldy. Máselen, Islandııa men Vengrııa 1:1 esebimen tarqassa, Portýgalııa – Avstrııa matchynda esep ashylmady. Bul joly da Krıshtıaný Ronaldýdyń oıyny onshalyqty mazaly bolmady, sol sebepti portýgaldar da asa bir basymdyq kórsete almady.
Jeksenbi kúni A tobyndaǵy eki oıyn ǵana oınaldy. Toptardaǵy matchtar birinshi ret bir mezgilde bastaldy. Bul kezdesýlerdiń nátıjeleri bir-birine áser etpeý úshin jasaldy. Mine, tap osy sátte azǵantaı sensasııa ómirge kelgen sııaqty. Biz bul jerde burynnan fýtbolda ózindik dástúri bar Rýmynııa quramasynyń Albanııadan 0:1 bolyp utylyp qalǵanyn osyndaı kútpegen nátıjege balap otyrmyz. Osynyń saldarynan rýmyndar sońǵy orynda qaldy da, albandar kelesi kezeńge baratyn bolyp shyǵa keldi. Osymen qatar ótken Shveısarııa – Fransııa kezdesýinde máseleni ońynan sheship qoıǵan qarsylastar asa kóp alqynýǵa barmady. Sondyqtan onyń esep ashylmaǵan kúıde aıaqtalǵanyna tańǵalýǵa bolmaıtyn shyǵar.
Serik PIRNAZAR,
«Egemen Qazaqstan»