Qazaqstan Respýblıkasynyń Syrtqy ister mınıstri Erlan Ydyrysovtyń Nıý-Iorkke sapary aıaqtaldy. Ol 2016 jylǵy 27-29 maýsymdaǵy Nıý-Iorkke saparynyń aıasynda Birikken Ulttar Uıymy Qaýipsizdik Keńesiniń (BUU QK) turaqty emes múshelerin saılaýǵa qatysyp, birqatar elderdiń syrtqy saıasat vedomstvolarynyń basshylarymen kezdesti jáne amerıkalyq, sondaı-aq, basqa da elderdegi áriptesterimen kelissózder júrgizdi.
Qazaqstannyń BUU Qaýipsizdik Keńesiniń 2017-2018 jyldarǵa turaqty emes múshesi bolyp saılanýy sapardyń mańyzdy oqıǵasy boldy. Qazaqstannyń kandıdatýrasyn daýys berýge qatysqan BUU-ǵa múshe 193 memlekettiń 138-i qoldady (qarsylasymyz Taılandqa 55 memleket daýys berdi). E. Ydyrysov qazaqstandyq ótinimdi maquldaýda Prezıdent Nursultan Nazarbaevtyń ony belsendi ilgeriletýi men BUU Bas Assambleıasynyń 70-shi sessııasy barysynda usynylǵan baǵdarlamalyq bastamalary sheshýshi ról atqarǵanyn atap ótti.
«Qazaqstan úshin bul – tarıhı kún. Bizdiń elimiz BUU Jarǵysy boıynsha jahandyq qaýipsizdik pen beıbitshilikti saqtaýǵa ókilettengen eń mańyzdy saıası organnyń quramyna tarıhta birinshi bolyp saılanǵan Ortalyq Azııa memleketi boldy. Bul – Qazaqstannyń jáne Memleket basshysy Nursultan Nazarbaevtyń jeke tulǵasynyń halyqaralyq deńgeıdegi bıik bedeliniń, onyń jahandyq jáne óńirlik máselelerdi retteýge, ıadrolyq qarýsyzdaný men taratpaý máselelerin ilgeriletýge qosqan biregeı úlesiniń jarqyn aıǵaǵy», – dedi osyǵan oraı E.Ydyrysov.
Mınıstrdiń aıtýynsha, Qazaqstannyń osyndaı asa kórnekti tabysqa Táýelsizdigimizdiń 25 jyldyǵy, sondaı-aq, Qazaqstannyń dıplomatııalyq qyzmeti kúni (2 shilde) aıasynda qol jetkizýiniń sımvoldyq máni bar.
Daýys berýdiń qorytyndysy boıynsha Syrtqy ister mınıstri Qazaqstan tarapynan ótinimimizdi qoldaǵan barlyq delegasııalarǵa shynaıy alǵysyn bildirdi jáne barlyq kandıdat memleketterdiń shyn, ashyq naýqan júrgizgenderine joǵary baǵa berdi. E. Ydyrysovtyń aıtýynsha, qazaqstandyq dıplomatııa BUU QK-ge aldaǵy múshelikti qaýipsizdik pen beıbitshilik, qarýsyzdaný, terrorızmge qarsy kúres, óńirlik daýlardy retteý máselelerin sheshýge jáne ornyqty damýdyń maqsattaryn júzege asyrýǵa úlesimizdi eń joǵary jahandyq deńgeıde qamtamasyz etý úshin paıdalanýǵa nıetti.
Qazaqstan BUU QK turaqty emes múshesi bolýǵa óz kandıdatýrasyn usynýdy alǵash ret 2010 jylǵy maýsymda jarııa etti. Sol ýaqyttan bastap qazaqstandyq dıplomattar ótinimimizdiń tájirıbelik máni men negizdemesin halyqaralyq qoǵamdastyqqa jetkizý, múshe memleketterdiń meılinshe aýqymdy tobynyń qoldaýyn alý úshin birizdi jumys atqardy.
Qazaqstan óziniń BUU QK sheńberinde atqaratyn jumysynyń tórt basym baǵytyn belgiledi: ıadrolyq, energetıkalyq, sý jáne azyq-túlik qaýipsizdigi. Osy basymdyqtardy álemniń kópjaqty dıplomatııasynyń eń basty alańynda ilgerilete otyryp, Qazaqstan Qaýipsizdik Keńesimen, jalpy BUU-ǵa múshe barlyq áriptesterimen óte tyǵyz is-qımyl jasaýǵa nıet bildirdi.
Qaýipsizdik Keńesiniń turaqty emes múshesi retinde Astana búkil Ortalyq Azııanyń múddelerin de osy alańda qorǵaıtyn bolady jáne óńir úshin mańyzdy máselelerdi kótermekshi. E.Ydyrysov saılaý qarsańynda quramyna sáıkesinshe BUU-nyń 120 jáne
33 memleketi kiretin eki iri birlestiginiń, ıaǵnı Qosylmaý qozǵalysy men Latyn Amerıkasy jáne Karıb basseıni memleketteri tobynyń turaqty ókilderi aldynda sóz sóıledi. Osy kezdesýler barysynda Qazaqstan syrtqy saıasat vedomstvosynyń basshysy dıplomattardy terrorızmge qarsy kúres, qarýsyzdaný men jappaı qyryp-joıý qarýyn taratpaý salalaryndaǵy Memleket basshysynyń jahandyq bastamalaryna jáne «Álem. XXI ǵasyr» manıfesiniń mazmunyna jan-jaqty toqtala otyryp, Qazaqstan syrtqy saıasatynyń ózekti basymdyqtarymen tanystyrdy.
Budan basqa, E.Ydyrysov Italııa, Shvesııa, Nıderland, Efıopııa, Taıland syrtqy saıasat vedomstvolarynyń basshylarymen, Ulybrıtanııa, Fransııa, Qytaı, AQSh, Japonııa, Fınlıandııa, Úndistan, Pákistan, Iran, Túrkııa jáne t.b. elderdiń BUU janyndaǵy turaqty ókilderimen kezdesýler ótkizip, kelissózder júrgizdi. Olardyń barysynda ekijaqty qatynastar men kópjaqty alańdardaǵy ózara is-qımyl máseleleri talqylandy.
Elimizdiń Syrtqy ister mınıstri saparynyń sońǵy kúninde AQSh Memlekettik hatshysynyń kómekshisi Nısha Bısvalmen kezdesti. Kezdesý barysynda Qazaqstan-Amerıka strategııalyq únqatysýyn ilgeriletý, ekijaqty yntymaqtastyqtyń jáne halyqaralyq kún tártibiniń keń aýqymdy máseleleri boıynsha pikir almasty.
Jalpy, E.Ydyrysovtyń Nıý-Iorkke sapary BUU Qaýipsizdik Keńesine múshelikke memleketimizdiń ótinimin tabysty bekitip qana qoımaı, Memleket basshysynyń syrtqy saıasatqa qatysty jahandyq basymdyqtaryn odan ári ilgeriletýdi qamtamasyz etti.
Sáýlebek BIRJAN