Qazaqstannyń mártebesi joǵary
Qazaqstannyń Birikken Ulttar Uıymy Qaýipsizdik Keńesiniń 2017-2018 jyldardaǵy turaqty emes músheligine saılanýyna baılanysty Ortalyq Azııa memleketteriniń dıplomattary da izgi tilekterin jetkizip jatyr. Bul oryndy da. О́ıtkeni, Qazaqstan Respýblıkasy Azııa toby memleketteriniń atynan atalǵan Keńeske múshe bolyp saılandy.
Chınar RÝSLAMOVA,
Túrikmenstannyń Qytaıdaǵy Tótenshe jáne ókiletti elshisi:
– Qazaqstannyń Birikken Ulttar Uıymy Qaýipsizdik Keńesiniń turaqty emes músheligine saılanýyna baılanysty men de óz quttyqtaýymdy jetkizgim keledi. Qazaq halqy túrikmendermen baýyrlas, dos, týys. Bizdi tek shekara ǵana bólip tur. Al, shyn máninde biz bir halyqpyz. Myńdaǵan jyldardan beri birge tatý-tátti ómir súrip kelemiz. Sondyqtan, Qazaqstannyń Birikken Ulttar Uıymy Keńesine múshe bolýyn biz de zor qýanyshpen qabyldadyq. Bul Qazaq eliniń álemdik deńgeıde mártebesiniń bıik ekendigin taǵy bir kórsetip berdi.
Shynyn aıtý kerek, Qazaqstan ár ýaqytta beıbitshilikti, turaqtylyqty yntymaqtastyqty basym baǵyt retinde ustanyp keledi. Táýelsiz Qazaq eliniń osyndaı syndarly saıasatyna kórshiles jatqan Azııa memleketteri ǵana emes, álemdegi basqa da beıbitshil memleketter qoldaý bildirip otyr.
Túrikmenstanda qazaq dıasporasy kóp. Máselen, bizdiń otbasy qazaq halqynyń salt-dástúrimen jaqsy tanys. Qazaqtardy qonaqqa shaqyrǵan kezde, mindetti túrde bárimizdiń súıikti asymyzǵa aınalǵan qazaqsha asylǵan etti aldyna tartamyz. Al Túrikmenstanda turatyn baýyrlarymyz bizdiń ulttyq taǵamdarymyzdy daıyndaýdyń qyr-syryn jaqsy biledi.
Qazaqstan men Túrikmenstan arasynda ekonomıkalyq baılanys óte jaqsy. Bul rette Qazaqstan – Túrikmenstan – Iran arasyndaǵy transulttyq temirjoly yntymaqtastyǵymyzdy odan ári keńeıte tústi. Endi Parsy shyǵanaǵymen Qytaıdyń naryǵyna tikeleı shyǵýǵa múmkindik aldyq. Baýyrlas elder arasyndaǵy ózara yntymaqtastyq qarym-qatynas aldaǵy ýaqytta da damı beretinine senimim mol.
Qanaıym BAQTYǴÝLOVA,
Qyrǵyz Respýblıkasynyń Qytaıdaǵy Tótenshe jáne ókiletti elshisi:
– Qazaqstannyń joǵary ókiletti organǵa saılanýy Prezıdent Nursultan Nazarbaevtyń halyqaralyq bedel-abyroıynyń asqaq ekendiginiń aıqyn kórinisi. Nursultan Nazarbaevtyń kóregen basshylyǵynyń arqasynda Qazaqstan álemdik qaýipsizdik pen beıbitshilikti qamtamasyz etý baǵytynda batyl qadamdar jasap keledi. Sondyqtan, Qazaqstannyń osyndaı saıasatyna kórshiles jatqan elder de árdaıym qoldaý bildiredi. Birikken Ulttar Uıymy Qaýipsizdik Keńesiniń turaqty emes músheligine saılaý bolǵan kezde Qyrǵyz Respýblıkasynyń Qazaqstandy qoldap, daýys berýiniń mánisi de osy.
Qazaq eliniń basshysy Nursultan Nazarbaevtyń bastamasymen Qazaqstan árdaıym álemdik deńgeıdegi ózekti máselelerdi kóterip keledi. Máselen, Semeı ıadrolyq polıgonynyń jabylýy, Orta Azııa aımaǵynda ıadrolyq synaqtardy toqtatý jónindegi kelisim, Birikken Ulttar Uıymynyń beıbitshilikti qalyptastyrý týraly jalpyǵa ortaq deklarasııasynyń qabyldanýy jáne basqa da beıbitshilik baǵyttaǵy mańyzdy sheshimderdiń júzege asýy, mine, munyń bári Qazaqstan tarapynan ıgi qadam edi. Osyndaı syndarly saıasattyń nátıjesinde Qazaqstannyń bedeli halyqaralyq keńistikte odan ári nyǵaıa tústi. Endi Qazaqstannyń Birikken Ulttar Uıymy Qaýipsizdik Keńesiniń turaqty emes músheligine saılanýyna baılanysty osy baǵyttaǵy aýqymdy jumystardyń jalǵasa beretindigi sózsiz.
Parvız DAVLATZODA,
Tájikstannyń Qytaıdaǵy Tótenshe jáne ókiletti elshisi:
– Aıtýly oqıǵaǵa baılanysty Qazaqstan halqyn shyn júrekten quttyqtaımyn. Shynynda da bul mereıli mártebe. Muny biz de asyǵa kútken edik. Endi Qazaqstan barlyq Ortalyq Azııa memleketterimen, onyń ishinde Tájikstan da bar, strategııalyq áriptestikti saqtaı otyryp, jańa bıikterge umtylatyny sózsiz. Bul rette Qazaqstan Birikken Ulttar Uıymynyń Qaýipsizdik Keńesinde bizdiń aımaqtyń múddesin laıyqty qorǵaı alatynyna kámil senemin. О́ıtkeni, dál qazirgi sátte bizdiń elde qaýipsizdik pen turaqtylyqty qamtamasyz etý eń qajet jáne ózekti másele bolyp otyr.
Jazyp alǵan
Sadyq ÁKIJANOV,
«Egemen Qazaqstan» – Beıjińnen
Qytaı Halyq Respýblıkasy