aktobetimes.kz
Budan birqatar ýaqyt buryn emshi retinde aty shyqqan araldyq Erbosyn Serikbaev qazirgi kúnderi Aqtóbeda sol kásibin júrgizip jatyr. aktobetimes.kz portalynyń habaryna qaraǵanda, 13 jasar emshi bala munda týystaryna qydyryp kelgen kórinedi. Ol munda áli aıǵa jýyq bolatynǵa uqsaıdy. Emshiniń kelgenin bilip qoıǵan jergilikti jurt ol jatqan úıge ózderi kelip, basyp qalǵan. Portaldyń málimetinshe, osy kúnderi Erbosyn emdelýshi qabyldap jatqan úıdiń mańy kezekke turǵan adamdardyń nópirine aınalyp ketken. Olardyń arasynda emshi bala týraly ańyzǵa bergisiz áńgimeler gýlep tur. Sonyń biri Erbosynnyń aldyna barǵan zaǵıp jandardyń janarlary ashylyp ketkenin aıtsa, endi bireýleri tipti eki aıaǵyn basa almaı qalǵan sal adamdardyń tabandarynan tik turyp ketkenderin aıtady. Jýrnalıster barǵanda, Erbosyn ózin sýretke túsirte qoımapty. Ol kelgenderde arnaıy baǵa da belgilemegen. Kim ne berse, sony alady. Buǵan deıin Erbosyn týraly talaı jazylǵan. Sonyń ishinde oǵan bir aqsaqaldy qarııanyń aıan berip, osy jolǵa túsirgeni de aıtyldy. Emshiniń Qyzylorda oblysyna qarasty Aral aýdanyndaǵy Aralqum eldi mekenindegi úıine keletinder tipti kóp desedi. Onda balanyń kúnine 5 myńǵa deıin adam qabyldaı alatyny da jazyldy. Qazir Erbosynnyń erekshe qabiletine senetin de, kekesinmen qaraıtyndar da tabylady. Biraq buǵan biz tóreshildik ete almaımyz. Al dárigerler mundaı táýipterge syn kózimen qaraıdy. Oblystyq densaýlyq basqarmasynyń bastyǵy Áset Qalıevtiń aıtýynsha, emdeý úshin onda aldymen tıisti dıplom jáne sertıfıkat bolýy kerek. Sondyqtan ol jurtqa 13-tegi balaǵa úmit artpaı, dárigerlerge kórinýge keńes beredi. Satybaldy SÁÝIRBAI