Astana qalasyndaǵy №99 orta mektepte zamanaýı tehnologııalarmen jabdyqtalǵan, oqý prosesin jańa deńgeıge kóterýge baǵyttalǵan ınnovasııalyq bilim berý keńistigi ashyldy. TopIQ Smart Class pılottyq jobasy qala ákimdiginiń bastamasymen engizilip otyr. Bul týraly Premer-mınıstrdiń resmı aqparattyq resýrsynan málim boldy, dep habarlaıdy Egemen.kz.
Premer-mınıstrdiń orynbasary – mádenıet jáne aqparat mınıstri Aıda Balaeva ashyq sabaq barysynda jańa júıeniń múmkindikterimen tanysty. Sabaqta ınnovasııalyq synyptyń negizgi fýnksııalary men bilim berý prosesindegi praktıkalyq áleýeti kórsetildi.
TopIQ Smart Class – ózara baılanysta jumys isteıtin smart ústel, smart partalar men smart taqtadan turatyn birtutas sıfrlyq ekojúıe. Júıede oqý prosesin avtomattandyrýǵa jáne ony ár oqýshynyń bilim deńgeıi men jeke ereksheligine qaraı beıimdeýge múmkindik beretin jasandy ıntellekt tehnologııalary da qoldanylady. Munyń bári tıimdi, ınteraktıvti ári derbes bilim berý ortasyn qalyptastyrýǵa baǵyttalǵan.
Aıda Balaeva Nurjas Sadyrbaevty halyqaralyq jobadaǵy jeńisimen quttyqtady
Aıda Balaeva bilim berý prosesine ınnovasııalyq tehnologııalar men jasandy ıntellekt quraldaryn engizý máselesine jan-jaqty ári baıyppen qaraý qajet ekenin atap ótti. Onyń aıtýynsha, eń aldymen mundaı sheshimderdiń balalardyń bilim sapasyna áseri eskerilýi tıis.
«Mundaı oıyn jáne sıfrlyq formattardyń oqý prosesine qalaı yqpal etetinin naqty túsiný mańyzdy. Dástúrli oqytý júıesi de óz mánin saqtaýy kerek. Pánderdi oqytýda saralanǵan tásil qoldanylyp, ár balanyń jeke ereksheligi eskerilýi qajet. Ustazdyń basty mindeti – tek bilim berý ǵana emes, sonymen qatar tulǵa qalyptastyrý, jaýapty ári laıyqty azamat tárbıeleý. Osyǵan baılanysty mundaı tehnologııalardyń artyqshylyqtary men yqtımal táýekelderine keshendi taldaý júrgizý mańyzdy», dedi Úkimet basshysynyń orynbasary.
Innovasııalyq synyp 25 smart partamen jabdyqtalǵan. Ár parta oqýshyǵa jeke sıfrlyq jumys keńistigin usynady. Oqýshylar osy qurylǵylar arqyly elektrondy oqýlyqtarmen jumys istep, tapsyrmalar oryndaıdy, mýzykalyq aspaptardy meńgeredi, sondaı-aq 3D sýret salý jáne modeldeý daǵdylaryn damytady.
Jasandy ıntellekt júıesi oqýshylardyń úlgerimin taldap, olardyń daıyndyq deńgeıine qaraı tapsyrmalardy avtomatty túrde beıimdeıdi. Al, pedagog smart ústel arqyly ár oqýshynyń jumysyn naqty ýaqyt rejıminde baqylap, oqý qarqynyn retteı alady jáne qajet kezde qoldaý kórsetedi. Sonymen qatar AI negizindegi analıtıkalyq derekter ár balanyń oqý dınamıkasyn obektıvti baǵalaýǵa múmkindik beredi.
Aıda Balaeva: Kreatıvti ekonomıka tek shabyt pen ıdeıaǵa ǵana súıenip damı almaıdy
Smart taqta sabaqtardy tolyq ınteraktıvti formatta ótkizýge jol ashady. Onyń kómegimen oqý materıaldaryn sıfrlyq formatta saqtap, qaıta paıdalanýǵa, sondaı-aq oıyn jáne jarys elementteri bar sabaqtar uıymdastyrýǵa bolady.
Joba zamanaýı ınteraktıvti bilim berý ortasyn qalyptastyrýǵa, bilim sapasyn arttyrýǵa jáne jańa býynnyń sıfrlyq quzyretterin damytýǵa baǵyttalǵan.
Aıda Balaeva: Balalardyń jazǵy demalysy qaýipsiz ári sapaly ótýi tıis