AQSh pen Iran arasyndaǵy kelissózderdiń tyǵyryqqa tirelýi álemdik munaı naryǵyndaǵy alańdaýshylyqty kúsheıtip, munaı baǵasynyń taǵy da ósýine áser etti, dep habarlaıdy Egemen.kz.
18 mamyr kúni Astana ýaqytymen saǵat 09:10-daǵy málimet boıynsha Brent markaly munaıdyń bir barreli 111,16 dollarǵa jetti. Bul ótken aptamen salystyrǵanda 6,68 paıyzǵa joǵary.
Halyqaralyq energetıka agenttigi Ormuz buǵazynyń jabylýy saldarynan álemdik munaı qory rekordtyq deńgeıde azaıyp jatqanyn málimdedi. Agenttik úzdiksiz jetkizilimdegi irkilister qorlardyń kúrt qysqarýyna ákelip, aldaǵy ýaqytta munaı baǵasynyń odan ári sharyqtaý qaýpin arttyratynyn eskertti.
Serik Jumanǵarın: Munaı óndirisi aqsamaǵanda, IJО́ ósimi 6%-dan asar edi
Vashıngton men Tegeran arasyndaǵy shıelenis sáýir aıynda jasalǵan álsiz bitimge qaramastan báseńdemedi. Iran álemdik munaı men gaz tasymalynyń shamamen besten biri ótetin Ormuz buǵazyn áli de buǵattap otyr.
Al AQSh prezıdenti Donald Tramp ákimshiligi Iran porttaryna jasalǵan qorshaýdy qoldaıtynyn bildirdi. Keshe amerıkalyq kóshbasshy Iranǵa qatysty «ýaqyt taýsylyp bara jatyr» dep málimdep, qatań eskertý jasady.
Eske salaıyq, Taıaý Shyǵystaǵy jaǵdaıdyń ýshyǵýy aıasynda Irak Ormuz buǵazy arqyly munaı eksportyn shamamen 9 esege qysqartty.
Buǵan deıin AQSh Iran eline Ormuz buǵazyn birtindep ashyp, porttarǵa qoıylǵan blokadany alyp tastaýdy usynǵan bolatyn.